Azərbaycan, Bakı, 11 fevral /Trend, müxbir A.Axundov/
2012-ci ildə Azərbaycan Vergilər Nazirliyinin xətti ilə büdcə daxilolmalarının 31,7 faizini borclu vergi ödəyiciləri üzrə (vaxtından gec ödənişlər) məcburi alınma tədbirləri nəticəsində ödənişlər təşkil edib. Trend-in məlumatına görə, bu barədə nazirliyin "Vergilər" qəzetində dərc olunan məlumatda deyilir.
"Bu da 2011-ci illə müqayisədə könüllü yerinə yetirmə səviyyəsinin 67 faizdən 68,3 faizədək artması deməkdir", - məlumatda bildirilir.
2012-ci il ərzində vergi orqanları tərəfindən borclu vergi ödəyicilərinin dövlət büdcəsinə yaranmış borclarının ödənilməsinin təmin edilməsi məqsədilə əmlakın siyahıya alınması barədə 51 030 qərar qəbul edilib. Bu dövr ərzində açılmış qərarlar da daxil olmaqla, ümumilikdə 247,6 milyon manat məbləğində 48 575 qərar bağlanıb.
2012-ci ildə 196 393 borclu vergi ödəyicisinin borcu ləğv edilib ki, bu da ötən il borclu qalan vergi ödəyicilərin ümumi sayının 100,5 faizini təşkil edir.
2012-ci ildə borc məbləği 2011-ci illə müqayisədə 16,2 faiz, 2010-cu ilə nisbətən isə 32,7 faiz azalıb.
