Azərbaycan, Bakı, 13 mart /Trend, müxbir H.Vəliyev/
Kənd təsərrüfatında kooperasiya problemi həll edilmədən Azərbaycanın aqrar sahəsində böyük irəliləyişlər gözləməyə dəyməz. Trend-in məlumatına görə, bu barədə çərşənbə günü jurnalistlərə kənd təsərrüfatı nazirinin müavini Bəhram Əliyev deyib.
"Kənd təsərrüfatı kooperasiyası haqqında" qanun layihəsinin qəbulundan sonra Kənd Təsərrüfatı Nazirliyi yanında xüsusi kooperasiya qurumunun yaradılması planlaşdırılır.
"Bu qurum kiçik fermer təsərrüfatlarının birləşməsinə və onların fəaliyyətinə kömək məqsədilə yaradılır", - Əliyev qeyd edib.
Onun sözlərinə görə, kiçik fermer təsərüfatları vahid şəkildə birləşdikdən sonra istehsalçı, istehlakçı və marketikq problemlərinin həlli üçün ayrı-ayrı kooperativlər yaradılacaq. Kooperativlər isə vahid bir klinik bank tərəfindən idarə olunacaq. Bütün məsələlər Kənd Təsərrüfatı Nazirliyi yanında yaradılacaq kooperasiya qurumu tərəfindən tənzimlənəcək.
Nazir müavini hazırda ölkədə yaradılan iri fermer təsərrüfatlarının da kooperativdə birləşməsi imkanlarını istisna etməyib.
"Hazırda Beyləqan və Ağcəbədi rayonlarında 3300 hektar və 1500 hektar sahədə iri fermer təsərrüfatları yaradılıb. Bu işlər davam etdirilir. Buna baxmayaraq, "Kənd təsərrüfatı kooperasiyası haqqında" qanun layihəsinin qəbulundan sonra ola bilər ki, bu təsərrüfatlar da kooperasiya şəklində birləşsinlər", - Əliyev bildirib.