Azərbaycan, Bakı, 6 avqust /Trend/
2013-ci il yanvar-iyun aylarının nəticələri üzrə Azərbaycan regionlarında əhaliyə verilən kreditlər 1544,67 milyon manat və ya bankların kredit portfelinin ümumi həcminin 11,2 faizini təşkil edib. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
AMB-nin məlumatına görə, Bakı üzrə bu göstərici 12 229,4 milyon manat təşkil edib ki, burada milli valyutada verilən kreditlərin payına 8594,5 milyon manat düşüb. 2013-cü il iyulun 1-nə ölkədə orta faiz dərəcəsi 14,3 faiz, Bakı üzrə isə 13,7 faiz təşkil edib.
Kreditləşmənin həcmi Abşeron iqtisadi rayonu üzrə orta faiz dərəcəsi 18,8 faiz olmaqla 344,1 milyon manat, Aran iqtisadi rayonu üzrə 19,6 faizlə 539,15 milyon manat, Dağlıq Şirvan iqtisadi rayonu üzrə 21 faizlə 47,3 milyon manat, Gəncə-Qazax iqtisadi rayonu üzrə 21,1 faizlə 203,7 milyon manat, Quba-Xaçmaz - 20,5 faizlə 56,5 milyon manat, Lənkəran - 23,2 faizlə 156,9 milyon manat, Şəki-Zaqatala - 22,6 faizlə 72,87 milyon manat, Yuxarı Qarabağ - 14,6 faizlə 27,2 milyon manat, Kəlbəcər-Laçın - 21 faizlə 10,7 milyon manat, Naxçıvan - 10,8 faizlə 86,14 milyon manat olub.
Hesabat dövründə bankların ayırdığı kreditlərin ümumi həcmi 13 774,5 milyon manat olub, ötən ilin müvafiq dövründə isə bu rəqəm 10 734,8 milyon manat təşkil edib.
Azərbaycan bankları bu ilin I yarısında iqtisadiyyatın akreditləşməsini 12,5 faiz, illik hesabatda isə 28,3 faiz artırıblar.
Azərbaycanda 43 bank fəaliyyət göstərir.