Azərbaycan, Bakı, 4 noyabr /Trend, müxbir A.Axundov/
Bazar ertəsi Milli Məclisin 5 komitəsi (İqtisadi, Sosial, Aqrar siyasət, Təhlükəsizlik məsələləri, Təbii resurslar, enerji və ekologiya komitələri) tərəfindən ölkənin 2014-cü il üzrə dövlət büdcəsi layihəsi parlamentin plenar iclasının müzakirəsinə tövsiyə edilib.
Trend-in məlumatına görə, bundan başqa, Milli Məclis 2014-cü il üzrə Dövlət Sosial Müdafiə Fondunun (DSMF) büdcəsi, yaşayış minimumu və ehtiyac meyarları haqqında qanun layihələri sonradan baxılması üçün tövsiyə edib.
Layihəyə əsasən, 2014-cü ildə DSMF-nin xərcləri və gəlirlərinin 11,2 faiz və ya 295,8 milyon manat artaraq 2,928 milyard manat təşkil edəcəyi proqnozlaşdırılır.
Ölkə üzrə yaşayış minimumu builki 116 manatdan 2014-cü ildə 125 manata qədər, həmçinin əhalinin əmək qabiliyyətli hissəsi üçün 136 manata qədər (2013-cü ildə 125 manat), uşaqlar və pensiyaçılar üçün 103 manata qədər (müvafiq olaraq 93 manat və 94 manat) artırılacaq.
"2014-cü ildə ehtiyac meyarının səviyyəsi haqqında" qanun layihəsi bu meyarın ünvanlı sosial yardımların təyinatı üçün 2013-cü ildəki 93 manatdan 100 manata qədər artırılmasını nəzərdə tutur.