Azərbaycan, Bakı, 28 mart /Trend, müxbir E.Əliyev/
Dünya Bankının (DB) II "Azərbaycan kənd investisiya" layihəsi (AzRIP) üzrə əlavə maliyyə vəsaiti 2014-cü ildə ayrıla bilər. Bu barədə cümə günü Trend-ə bankın Bakı nümayəndəliyindən bildiriblər.
Söhbət 50 milyon dollar həcmində əlavə maliyyə vəsaitindən gedir.
Nümayəndəlikdən qeyd ediblər ki, işlər ştat rejimində gedir: "Ölkə hökuməti və Dünya Bankı arasında danışıqlar yaxın vaxtlarda başlayacaq və ümid edirik ki, ayrılacaq vəsaitlər bu il də olmasa, gələn maliyyə ilində təsdiq ediləcək".
Qeyd edək ki, Azərbaycan hökuməti və Beynəlxalq Yenidənqurma və İnkişaf Bankı (DB qrupuna daxildir) AzRIP-2 üzrə kredit sazişini 2012-ci ilin oktyabrında imzalayıblar. Layihənin dəyəri 53,6 milyon dollardır. Bundan 30 milyon dollar Beynəlxalq Yenidənqurma və İnkişaf Bankının xətti ilə, 23,6 milyon dollar isə Azərbaycan hökumətinin layihədəki iştirak payı hesabına ayrılacaq.
