Azərbaycan, Bakı, 2 iyun /Trend, müxbir Z.Qurbanova/
Azərbaycanda elektron ipoteka iyulun 1-dən işə salınacaq. Bu barədə Trend-ə bank bazarındakı mənbə məlumat verib.
Onun sözlərinə görə, ölkənin Mərkəzi Bankı yanında Azərbaycan İpoteka Fondunun (AİF) bütün müvəkkil kredit təşkilatları əməliyyatları "Elektron ipoteka" vasitəsilə həyata keçirməli olacaqlar.
Hazırda dövlət xətti ilə ipoteka kreditləri verən bütün banklar hələ ötən il AİF tərəfindən işə salınan elektron ipoteka üzrə pilot layihəyə qoşulublar.
Bununla əlaqədar AİF ötən ilin dekabrında fondun müvəkkil təşkilatlarının, ilk növbədə banklarının qoşulduqları portalı işə salıb.
Bazar iştirakçıları bildirirlər ki, "Elektron ipoteka" portalında qeydiyyatdan keçmək üçün min manat məbləğində birdəfəlik ödəmə təyin edilib. Portala çıxışı olan banklar ipoteka kreditinin alınmasına dair ərizələri işləyəcək və onları portalda yerləşdirəcək.
Onların fikrincə, elektron ipotekanın tətbiqi AİF-in müvəkkil təşkilatlarının sayının artmasına kömək edəcək. Bundan başqa, ipoteka kreditlərinin verilməsi sahəsində operativliyi yüksəldəcək, eləcə də ölkənin regionlarında ipotekaya çıxışı genişləndirəcək.
Hazırda yalnız ipoteka kreditlərinin elektron dövriyyəsi deyil, həm də ipoteka müqavilələrinin elektron formada (bəzi hallarda isə ipoteka kreditləri) mövcudluğu ümumdünya tendensiyasıdır. O cümlədən, belə imkan Amerika Birləşmiş Ştatlarında, İsveçdə, Böyük Britaniyada da mövcuddur. İpotek krediti üzrə daha mühüm sənədlər yaradılır, imzalanır, ötürülür və qorunub saxlanılır və bunun üçün ölkədə elektron imzaların olması vacibdir.
Bazar iştirakçıları hesab edirlər ki, hökumətin başlıca vəzifəsi bazarın sürətlə artdığı Azərbaycan regionlarında mənzil problemlərinin həllinin operativliyini təmin etməkdir. Elektron ipoteka kreditlərinin verilməsi prosesi, öz növbəsində, bankların regional filiallarının fəaliyyətinin aktivləşməsinə, onların sayının artımına, bina tikənlərin gəlirlərinin artımına imkan yaradır.
2014-cü ilin birinci rübündə AİF xətti ilə 25,85 milyon manat məbləğində kredit verilib ki, bu da mənzil maliyyələşdirməsinin ümumi həcmini 456,75 milyon manatadək artırıb.
