...

Heydər Əsədov: "Məqsədimiz natəmiz yerlərdə ət kəsimini tamamilə ləğv etməkdir" (FOTO)

Biznes və iqtisadiyyat xəbərləri Materials 23 Sentyabr 2015 18:04 (UTC +04:00)

Azərbaycan, Bakı, 23 sentyabr /Trend/

Bu gün Bakının Xəzər rayonunun Buzovna qəsəbəsində yerləşən "AzProtein FOODS GROUP" müəssisəsində heyvan kəsimi məntəqəsinin açılışı olub.

Kənd Təsərrüfatı Nazirliyinin mətbuat xidmətindən Trend-ə verilən məlumata görə, açılışda kənd təsərrüfatı naziri Heydər Əsədov iştirak edib. Nazir heyvanların, kəsilmiş ət məhsullarının soyuducu kamerada saxlanma şəraitinə, üzvi gübrə istehsalı müəssisəsinə baxıb, kolbasa məhsullarının istehsalı, baytarlıq sahəsində göstərilən xidmətlərlə tanış olub.

Nazir jurnalistlərə müsahibəsində deyib: "Ölkədə yeni tələblərə cavab verən ət kəsimi məntəqələrinin açılması qarşımızda duran vəzifələrdən biridir. Artıq bu istiqamətdə tədbirlər görülür. "Aqrolizinq" ASC tərəfindən bu müəssisənin tikintisi üçün 5,2 milyon manat vəsait ayrılıb. Bu gün biz müasir standartlara cavab verən, lazımi sertifikatları almış kəsim məntəqəsinin açılışında iştirak edirik".

H.Əsədov qeyd edib ki, kəsim məntəqələrinin sayı bundan sonra da artırılacaq: "Qaradağ rayonunda sahibkarlar tərəfindən sifarişlər verilib. Burada böyük bir heyvan kəsimi məntəqəsinin inşasına başlanılıb. İstəyirik ki, bir neçə il ərzində küçələrdə, natəmiz yerlərdə kəsim prosesini minimuma endirək və yaxın gələcəkdə bunun tamamilə ləğv edilməsi üçün tədbirlər görək".

Müəssisədə 60 işçi çalışır. Müəssisəyə ətlik istiqamətli heyvanlar, əsasən, Almaniyadan, Macarıstandan və Niderlanddan gətirilir.

Həmin gün H.Əsədov "Meyvəli" Meyvə-Tərəvəz Logistik Mərkəzi və "Aqrovest" meyvə-tərəvəz məhsullarının topdan və pərakəndə mərkəzinin birgə layihəsi olan kənd təsərrüfatı məhsullarının qablaşdırılması istehsalı yerində aparılan işlərlə tanış olub.

"Meyvəli" Meyvə-Tərəvəz Logistik Mərkəzi tərəvəzlərin topdan və pərakəndə satış bazası beynəlxalq avtomobil və dəmiryol magistralının kəsişdiyi dairədə Bakı şəhəri Qaradağ rayonu, Lökbatan qəsəbəsi Xocasən yolu, 57 ünvanda yerləşir. Dövlət lahiyə smeta sənədləri əsasında beynəlxalq standartlara uyğun inşa olunub, 2009-cu ildə istifadəyə verilib. Ümumi ərazisi 54 ha olan "Meyvəli" Meyvə-Tərəvəz Logistik Mərkəzi meyvə və tərəvəz məhsullarının saxlanması, satışı və tranziti üçün nəzərdə tutulub.

2014-cü il Qurban bayramı məqsədilə Azərbaycanın kənd təsərrüfatı naziri H.Əsədov "Meyvəli" Meyvə-Tərəvəz Logistik Mərkəzinin yeni korpuslarının tikintisinin təməlqoyma mərasimində iştirak edib. Nazir, həmçinin "AQROVEST" meyvə-tərəvəz topdan və pərakəndə satış mərkəzində nazirliyin təşəbbüsü ilə yaradılan qurbanlıq heyvanların satış yerinə baxış keçirib.

Məqalədə:
Xəbər lenti

Xəbər lenti