Sentyabrın 22-də Azərbaycan nümayəndə heyəti BVF və DB-nin illik toplantısında iştirak etmək üçün Vaşinqtona yola düşəcək. Azərbaycan Nazirlər Kabinetinin iqtisadiyyat və maliyyə-kredit siyasəti şöbəsinin müdiri Oqtay Haqverdiyevin Trend ə bildirdiyi kimi, nümayəndə heyətinin tərkibinə Nazirlər Kabinetinin nümayəndələri, maliyyə nazirinin müavini İlqar Fətizadə və Milli Bankın baş direktoru Şahmar Mövsümov daxildir.
Sentyabrın 23-də O.Haqverdiyev Beynəlxalq iqtisadiyyat institutunda çıxış edəcək. "Çıxış edəcəyim 10 dəqiqəlik məruzə Azərbaycanda iqtisadi vəziyyətə və digər problemlərə, o cümlədən onların həlli ilə bağlı məsələlərə həsr olunub", - deyə o bildirib.
Sentyabrın 24-25-də BVF və DB-nin illik iclası keçiriləcək. "İclasda BVF və DB rəhbərliyi görülmüş işlər və gələcək planlara dair hesabat verəcək", - deyə O.Haqverdiyev əlavə edib.
O, həmçinin, bildirib ki, DB və BVF Azərbaycanın nümayəndə heyəti ilə ikitərəfli görüşlər keçirməyi planlaşdırır. "Hələlik hansı məsələləri müzakirə edəcəyimiz məlum deyil, lakin DB layihələrin həyata keçirilməsi, BVF isə məsləhətləşmə üzrə yardımın göstərilməsi məsələsini müzakirəyə çıxaracaq", - deyə o vurğulayıb.
