Azərbaycanın Nazirlər Kabineti sentyabrın 25-də büdcə layihəsini prezidentin İcra Aparatına təqdim etməyi planlaşdırır. Nazirlər Kabinetindən Trend ə verilən məlumata görə, bu, əvvəlcədən müəyyən edilmiş tarixdir və onun dəyişdirilməsi nəzərdə tutulmayıb.
Büdcə layihəsinin müzakirəsi üçün baş nazir Artur Rəsizadənin sədrliyi ilə Nazirlər Kabinetinin geniş iclasının keçirilməsi planlaşdırılır. Həmçinin, iclasın tarixi təxmini olaraq sentyabrın 21-nə təyin olunub.
Maliyyə Nazirliyi 2006-cı il büdcəsində kəsirin olacağını güman edir. Büdcə kəsirinin həcmi 2006-cı ildə 790 mlrd manat təşkil edəcək. Kəsirin yerini isə 500 mlrd manat həcmində dövlət qısa müddətli istiqrazlar büuraxmaq, özəlləşdirmədən əldə olunacaq 200 mlrd manat məbləğində gəlir və Dünya Bankının PRSC proqramı çərçivəsində ayıracağı ümumi həcmi 90 mlrd manat olan ilk kredit vəsaitlərindən istifadə etməklə doldurmaq planlaşdırılır.
2006-cı ildə büdcə gəlirləri 2005-ci il üçün proqnoz göstəriciləri ilə müqayisədə 50% artaraq 15,5 trln manat və ya $3,4 mlrd təşkil edəcək. Büdcə gəlirlərinin 57,7%-ni Vergilər Nazirliyindən daxilolmalar, 37,1%-ni Dövlət Gömrük Komitəsindən daxilolmalar hesabına təmin etmək planlaşdırılır. 2006-cı ildə Azərbaycan Dövlət Neft Fondunun transferti $300 mln təşkil edəcək. Fiziki şəxslərdən tutulan gəlir vergisi üzrə ödənilən məbləğin həcminin 39,6%, mənfəət vergisi üzrə - 50%, əmlak vergisi üzrə - 40%, ƏDV üzrə - 27,5% olacağı nəzərdə tutulur.
Dövlət büdcəsinin xərcləri 49,3% artaraq 16,3 trln manat və ya $3,5 mlrd təşkil edəcək. Təhsil sistemi, səhiyyə və müdafiə sahələri isə daha çox maliyyələşdirilən sahələr olacaq.
Büdcənin parlamentdə müzakirəyə çıxarılması oktyabrın 5-10-na gözlənilir.
