2006-cı il yanvarın 1-dən milli valyutanın denominasiyası ilə əlaqədar hazırlanan yeni pul nişanlarının təqdimatıdekabrın 28-də Azərbaycan Milli Bankında keçiriləcək. Bu barədə Trend ə Milli Bankın mətbuat xidmətindən məlumat verilib.
Yeni Azərbaycan manatı denominasiya zamanı köhnə 5 min manata bərabər olacaq ki, bu da manatın aparıcı dünya valyutaları ilə yaxınlaşması məqsədi güdür. Azərbaycanda denominasiyanın məqsədi ABŞ dollarının alıcılıq qabiliyyətinə bərabər olan milli valyutanın yaradılması məqsədi güdür. Bunu Milli Bankın İdarə Heyətinin sədri Elman Rüstəmov bildirib.
Ümumilikdə Milli Bank 6 (hazırda onların sayı 10-dur) nominal üzrə (1, 5, 10, 20, 50 və 100 manat) 250 mln yeni əskinas və 150 milyon dəyərində 1, 3, 5, 10, 20 və 50 qəpiklik metal sikkə siyariş verib. Gələn il ərzində onlar 2007-ci il yanvarın 1-dən dövriyyədən çıxarılacaq köhnə pul nişanları ilə paralel olaraq dövriyyədə olacaq. Qeyd edək ki, 2005-ci il oktyabrın 1-dən bütün ticarət obyektlərinin, xidmət sahələrinin qiyəmt siyahısında məcburi olaraq 2 qiymətin (köhnə və yeni) göstərilməsinə başlanılıb.
Yeni Azərbaycan manatının tərtibi ilə avronun dizayneri olmuş avstriyalı rəssam Robert Kollin məşğul olur. Bu seçim 6 tanınmış Avropa şirkətinin təkliflərinin öyrənilməsindən sonra edilib.
