Azərbaycan hökuməti Ümumdünya Ticarət Təşkilatından (ÜTT) 10 il ərzində ölkənin sığorta bazarında xarici kapitalın iştirakına məhduddiyyətləri dəyişilməz saxlamağı xahiş etmək niyyətindədir. Bu barədə Trend ə maliyyə nazirinin müavini Azər Bayramov məlumat verib. Bu, Azərbaycanın ÜTT-na daxil olması üzrə danışıqlar prosesindəki şərtlərdən biridir.
A.Bayramov hesab edir ki, təcrübədə ÜTT-na üzv olan ölkələrdən müəyyən tələblərin yerinə yetirilməsi üçün möhlət alınması mümkündür. Məsələn, Ukrayna ölkənin sığorta bazarında xarici kapitalın iştirakının liberallaşdırılması üçün 5 illik müddət verilmişdi.
ÜTT Azərbaycana "Sığorta haqqında" qanundan xarici sığorta kapitalının 49%-in 51%-ə nisbətdə iştirakını göstərən bəndi çıxarmağı təklif edir. Azərbaycan sığortaçıları hazırki mərhələdə mümkün hesab etmirlər.Çünki liberalolaşdırma ölkə şirkətlərinin dünyanın sığorta nəhəngləri tərəfindən udulmasına səbəb ola bilər. Nazir müavinin sözlərinə görə, bununla əlaqədar, 2006-cı ildə parlamentə təqdim olunacaq "Sığorta haqqında" qanunun yeni redaktəsində bu nisbət saxlanılır. O, qanun layihəsinin demək olar ki, hazır olduğunu və yalnız beynəlxalq ekspertiza ilə bir sıra dəqiqləşdirilmələrin aparılacağını bildirib.
Azərbaycan hökuməti normativ aktların hazırlanmasına yardım göstərmək üçün Dünya Bankından yardım xahiş edib və artıq bank qrant ayrılması üçün razılığını verib. Hazırda həmin texniki yardımın alınması üçün dövlətdaxili proseduralar həyata keçirilir.
