Böyük Britaniyanın Milli Auditor Ofisinin (NAO) baş auditoru və nəzarətçisi Con Born Azərbaycanın Hesablama Palatasının (HP) dəvəti ilə aprelin 4-dən 8-dək Bakıda işgüzar səfərdə olacaq. Bu barədə Trend ə HP-də bildirilib.
Səfərin əsas məqsədi iki ali audit təşkilatı arasında əməkdaşlığın inkişafı, eləcə də HP və NAO arasında əməkdaşlıq sahəsində qarşılıqlı anlaşmaya dair memorandumun yerinə yetirilməsi ilə bağlı müzakirələr aparmaqdır. Memorandum 2004-cü ilin mayında Londonda imzalanıb.
Cənab C.Bornun iqtisadi profilli dövlət və ictimai təşkilatlar qarşısında çıxışı, eləcə də ali məktəblərdən birinin (Azərbaycan Dövlət İqtisad Universiteti və yaxud "Xəzər" Universiteti) tələbələri ilə görüşü planlaşdırılır. Həmçinin Milli Məclisin spikeri və iqtisadi siyasət daimi komissiyasının rəhbəri ilə görüşlər nəzərdə tutulub.
Diqqətəlayiqdir ki, Azərbaycan MDB məkanında Böyük Britaniya baş auditorunun səfər etdiyi ikinci ölkə (Rusiyadan sonra) olacaq. Ümumiyyətlə, o, keçmiş Sovet İttifaqı ölkələrindən Latviya və Estoniyada olub.