Azərbaycan hökuməti 2010-cu ilədək bəzi xidmət növlərinə görə tariflərin iki dəfə artırılması ilə bağlı Dünya Bankı qarşısında öhdəlik götürüb. Avropa Yenidənqurma və İnkişaf bankı bunun təsdiqlənməsini istəyir. Belə ki, bu, AzDRES-in bərpası üçün kreditin ayrılması şərtləri ilə bağlıdır. Trend in xəbər verdiyi kimi, bu barədə jurnalistlərə AYİB-in Azərbaycandakı nümayəndəsi Reymond Konvey məlumat verib. Onun sözlərinə görə, hazırda bank ölkə hökuməti ilə danışıqlar aparır.
AYİB Mingəçevirdə İES-in 8 enerji blokunun bərpası məqsədilə "Azərenerji" SC üçün kreditin ayrılması şərtlərinə bəzi dəyişikliklər etməyi təklif edib. Bu şərtlərdən biri respublikada elektrik enerjisi tariflərinin artırılması ilə bağlıdır.
Ancaq SC-nin bankın kreditlərindən imtina etməsinə dair qərar çıxarmasına səbəb olan şərtlər isə qüvvədə qalır. Bu, əsasən, vəsaitlərin mərhələli şəkildə ayrılmasına aiddir. SC nümayəndələri hesab edir ki, bu, layihənin həyata keçirilmə müddətinə təsir edə bilər. Bu isə "Azərenerji"ni qane etmir. Layihənin gerçəkləşdirilməsi üçün təxminən $150 mln lazımdır.
