Beynəlxalq Valyuta Fondunun (BVF) proqnozlarına əsasən, 2006-cı ildə Azərbaycanda inflyasiya artımı 26,2% təşkil edə və ötənilki göstəricini (24,3%) üstələyə bilər. Trend agentliyi BVF-nın hesabatına istinadən xəbər verir ki, bu proses neft hasilatı həcminin xeyli dərəcədə artmasına təsir göstərir. Fondun ekspertləri hesab edir ki, yaxın gələcəkdə ÜDM artımına dair proqnozlar əlverişlidir. Belə bir şəraitdə əsas məsələ inflyasiyanı birrəqəmli səviyyədə saxlamaqdan ibarətdir.
2006-cı ildə istehlak qiymətlərinin artım indeksi 12%-dək proqnozlaşdırılır. Azərbaycan Milli Bankı 2005-ci ilin fevralında manatın dollara bağlılığından imtina edib və valyuta məzənnəsini müəyyənləşdirməzdən əvvəl pul siyasətini sərtləşdirib.
Neft qiymətinin və ixracat həcminin artması Azərbaycanın ödəniş balansının cari hesab defisitini 5,2% ÜDM həcmində azaltmağa imkan verəcək. 2006-cı ildə cari hesab profisiti 17,7% ÜDM həcmində gözlənilir.
Əlverişli proqnozlar iqtisadiyyatın diversifikasiyasına köməklik edir. Bundan əlavə, fondun rəhbərliyi Azərbaycanın fiskal və pul-kredit siyasətini bəyənir. Bu arada, BVF-da hesab edirlər ki, əsas çətinlik neft hasilatında müşahidə olunan sürətli artımın öhdəsindən gəlməklə bağlı olacaq. Neft gəlirlərinin artımı yaxın 5 ildə cari hesab profisitinin və ümumilikdə büdcə profisitin artımına gətirib çıxaracaq. Bu baxımdan ortamüddətli fiskal strategiyanın hazırlanması vacibdir.
