Dövlət Gömrük Komitəsi (DGK), Prezidenti Aparatı, Nazirlər Kabineti, Milli Məclis, Ədliyyə Nazirliyi, BMT-nin İnkişaf Proqramının (UN DP) nümayəndələrinin daxil olduğu Azərbaycanın nümayəndə heyəti Estoniyada, ölkənin vergi və gömrük departamentində işgüzar səfərdədir. Trend in UN DP-yə istinadən verdiyi xəbərə görə, 15 nəfərdən ibarət nümayəndə heyətinə DGK sədrinin müavini Əsgər Abdullayev başçılıq edir.
Azərbaycanda gömrük sisteminin təkmilləşdirilməsi layihəsi çərsivəsində keçirilən, avqustun 14-ə qədər davam edəcək səfərin əsas məqsədi Avropa İttifaqının gömrük məcəlləsinin təcrübəsinin öyrənilməsindən ibarətdir. Səfər çərçivəsində nümayəndə heyəti müasir prosedurlarla tanış olmaq məqsədi ilə Muuqa limanında olacaq. Vergi və gömrük departamentinin vəzifəli şəxsləri, həmçinin departamentin baş direktoru ilə görüşlər keçiriləcək.
Avropa Komissiyasının vəsaitləri hesabına maliyyələşdirilmiş və UN DP tərəfindən həyata keçirilən layihə 2006-cı ilin yanvar ayında başlanıb. 900 min avro məbləğində layihənin məqsədi gömrük sahəsində qanunverici bazanın təkmilləşdirilməsi, onun dünya standartlarına, o cümlədən Avropa İttifaqının gömrük məcəlləsinə uyğunlaşdırılması, DGK-nin informasiya texnologiyalarının inkişaf strategiyalarının həyata keçirilməsindən ibarətdir.
