Avqustun 30-dan sentyabrın 6-a qədər Beynəlxalq Valyuta Fondunun (BVF) Yaxın Şərq və Orta Asiya ölkələri ilə iş üzrə Departamentinin direktor müavini Vitali Kramarenkonun başçılığı ilə fondun missiyasının Bakıya səfəri başlayır. Bu barədə Trend ə BVF-in Bakı nümayəndəliyindən bildiriblər. Mayra Zermeno və Şuanq Dinq texniki görüşlərə avqustun 30-dan, V.Kramarenko isə sentyabrın 1-dən etibarən başlayacaq.
Missiyanın əsas məqsədi 2006-cı ilin qalan dövrü üçün makroiqtisadi siyasətin Azərbaycan höküməti ilə müzakirəsi, həmçinin makroiqtisadi siyasətin və 2007-ci il üçün dövlət büdcəsi layihəsinin əsas prinsipləri üzrə məsləhətləşmələrin keçirilməsidir.
Valyuta fondu missiyasının sonuncu səfəri zamanı hökümət artıq makroiqtisadi vəziyyətə nəzarət kontekstində mütəmadi məsləhətləşmələrdə maraqlı olduğunu bildirib. Bununla əlaqədar fond ən azı ildə bir dəfə "BVF haqqında" Sazişin 4-cü maddəsinə əsasən, böyük missiya çərçivəsində icmallar keçirməyi qərara alıb. Lazım gələrsə, bir və ya iki missiya ola bilər.
BVF missiyasının səfərinin məqsədi BVF haqqında sazişin 4-cü maddəsi çərçivəsində, eləcə də gələcək əməkdaşlıq formasının Azərbaycan höküməti ilə araşdırma və müzakirələrinin keçirilməsindən ibarətdir. Hökümət icmalların kreditlərin verilməsi ilə müşayiət olunmasından imtina edib, gələcək əməkdaşlıq məsləhətləşmələr çərçivəsində olacaq və bu, həmçinin proqramlar əsasında da həyata keçirilə bilər.
