Yanvar-sentyabr aylarında Azərbaycan Kənd Təsərrüfatı Nazirliyi tərəfindən spirtli içkilərin istehsalı və idxalı üzrə 22 lisenziya verilib. Nazirliyin məhsul ehtiyatlarının keyfiyyəti, stardartlar və lisenziyalar şövbəsinin müdiri Əhliman Nəsirovun Trend ə verdiyi məlumata görə, lisenziyalardan 10-nu spirtli içkilər istehsal edən hüquqi şəxslərin, 4-ü spirtli içkilərin ixracı, qalan 8 lisenziya isə pivə istehsalı və idxalı ilə məşğul olan hüquqi şəxslərin payına düşür. Bu günə qədər Kənd Təsərrüfatı Nazirliyi tərəfindən 33 lisenziya (2005-ci ildə 11 lisenziya) verilib.
Onun sözlərinə görə, bu müddət ərzində 22 müəssisənin fəaliyyəti dayandırılıb. Onlardan 19-u ixrac, 3-ü isə spirtli içkilərin istehsalı ilə məşğul olan müəssisələrdir.
"Şirkətlərin fəaliyyətinin dayandırılmasının əsas səbəbi müəssislərin fəaliyyəti ilə bağlı hər hansı məlumatın nazirliyə təqdim olunmaması və lisenziyada nəzərdə tutulmuş qaydaların pozulması olub", - deyə N. Nəsirov vurğulayıb.
Alkoqollu içkilərin və tütün məmulatlarının istehsalı, idxalı və satışına xüsusi icazənin verilməsi üçün Nazirlər Kabineti tərəfindən təsdiq edilmiş əlavə şərtlərə əsasən, müəssisə illik istehsalı 100 min dkl-dən az olmamaqla qida etil spirti (tərkibində spirt komponentləri 80%-dən az olmamalıdır), 5 min dkl-dən az olmamaqla konyak spirti (üzümdən), 20 min dkl - xammal spirti (üzüm və başqa meyvələrdən), 100 min dkl - araq, 20 min dkl - şərab (üzüm və meyvələrdən), 10 min dkl - brendi, 30 min dkl - tərkibində spirtin həcmi 28%-dən az olmamaqla likyor və digər alkoqollu içkilər, 150 min dkl - şampan şərabının istehsalı üzrə lisenziya ala bilər.
