2007-ci ilin dövlət büdcəsində elmə 37,2 milyon manat, təhsilə isə 733,2 milyon manat məbləğində vəsaitin ayrılması nəzərdə tutulub. Bu barədə "Trendə" Milli Məclisin elm və təhsil məsələləri daimi komissiyasından bildiriblər..
Onu da bildirək ki, bu rəqəmlər cari illə müqayisədə xeyli çoxdur. 2006-cı ilə nisbətən elm xərcləri 2,8 milyon manat, təhsil xərcləri isə 235 milyon manat artırılacaq. Elmə ayrılan vəsait əsasən fundamental elmi tədqiqatlara və dövlət qurumlarında mövcud olan elmi-tədqiqat müəssisələri tərəfindən həyata keçirilən elmi işlərin maliyyələşdirilməsinə yönəldiləcək.
Təhsilə ayrılan vəsait isə şagirdlərin pulsuz dərsliklər, müasir tədris avadanlığı ilə təmin edilməsinə, yeni ümumtəhsil məktəbləri üçün binalarının tikintisinə, mövcud məktəblərin əsaslı təmirinə sərf ediləcək. Dövlət hesabına təhsil alan aspirantların, ali, orta ixtisas, peşə məktəbləri, peşə litseylərinin tələbə və şagirdlərinin təqaüdləri də artırılacaq. Qanun layihəsində ilkin olaraq, təqaüdlərin orta hesabla 16 faiz artırılması proqnozlaşdırılır.
