Trend xəbər verir ki, "Azərbaycan İnvestisiya Şirkəti" SC (AİŞ) Avropa Yenidənqurma və İnkişaf Bankı və Beynəlxalq Maliyyə Korporasiyası ilə tərəfdaşlıq münasibətlərinin yaradılması planları barədə bildirib.
Şirkətin icraçı direktorunun müavini Riyad Qasımov bildirib: "Onlarla birgə AİŞ fəaliyyətinin müəyyən mərhələsində gələcəkdə texniki qiymətləndirmələr aparmaqda, texniki-iqtisadi əsasnamələrin hazırlanmasında ixtisaslaşmış bir neçə şirkətin yaradılmasına kömək edən bazanın yaradılmasına nail ola biləcək".
Hazırda AİŞ bu sahədə növbəti investisiyalaşdırılacaq layihələr üçün qeyri-neft sektorunun daha əlverişli sayılan müxtəlif sahələrinin qiymətləndirilməsini aparır. Qeyd olunmalıdır ki, bu iş beynəlxalq təşkilatların cəlb edilməsi ilə həyata keçirilir. R.Qasımov bildirib: "Bu sahədə texniki-iqtisadi əsaslandırmalar aparılması üçün təcrübəsi olan böyük təşkilatların cəlb edilməsinin bizim üçün böyük əhəmiyyəti var. Azərbaycanda bazarın və onun müxtəlif sahələrində risklərin bu cür qiymətləndirilməsini apara bilən şirkətlər yoxdur. Hazırkı dövrdə biz beynəlxalq təşkilatları cəlb etməyə çalışırıq və bu məqsədlə vençur kapitalın beynəlxalq assosiasiyasına daxil oluruq. Mən düşünürəm ki, texniki qiymətləndirmələrin hazırlanması üçün məsləhətçilər cəlb edəcəyik".
AİŞ AR prezidentinin 30 mart 2006-cı il tarixli sərəncamı ilə qeyri-neft sektorlarının inkişaf etdirilməsi üçün investisiya yatırımlarının genişləndirilməsi, bu sahədə fəaliyyət göstərən müəssisələrin maddi və texniki bazasının yeniləşdirilməsi məqsədilə yaradılıb.