Azərbaycan bölgələrinin sosial-iqtisadi inkişafı üzrə Dövlət proqramının reallaşdırılmasının üç illiyi ilə bağlı tədbirin keçirilməsinin təxmini vaxtı 2007-ci il fevralın ortalarına müəyyənləşdirilib.
Dövlət proqramının həyata keçirilməsi üzrə katibliyin başçısı Ağacan Əhmədovun Trend ə verdiyi məlumata görə, hazırda tarix dəqiqləşdirilir və hesabat üzərində iş gedir. Tədbirin yüksək səviyyədə keçiriləcəyi ehtimal olunur.
İlkin məlumatlara görə, üç il ərzində təxminən 520 000 yeni iş yerlərinin açılması təmin olunub. Onlardan 277 000 yer daimi əsasdadır. Bu vaxt ərzində qoyulmuş investisiya həcmi hazırda dəqiqləşdirilir. Regional inkişafa qoyulan sərmayələr Asiya inkişaf Bankı, Dünya bankı, İslam inkişaf bankı və b. xətti ilə olub. A.Əhmədov qeyd edib ki, xarici borclardan başqa, investisiyaların böyük hissəsi büdcə vəsaitləri hesabına həyata keçirilib, həmçinin özəl qoyuluşlar da var.
Dövlət proqramının səmərəli icrası üçün həmçinin Katibliyin institusional inkişafına texniki yardım verilir. O, BMT-nin İnkişaf proqramı, Almaniya texniki yardım təşkilatı (GTZ) və b. xətti üzrə yardım alıb. Ötən il İİB 265 min ABŞ dolları həcmində qrant ayırıb. Onlar katibliyin regional ofislərinin təmin olunması (hazırda NMR ilə birlikdə onların sayı 9-dur), informasiya bazanın yaradılmasında məsləhət yardımı üçün nəzərdə tutulub.
