Azərbaycan, Bakı/ Trend müxbir İ.Xəlilova/ "European Tobacco-Baku" yüngül və keyfiyyətli siqaret istehsalı üçün yeni texnologiyaların tətbiqi proqramını hazırlamağa başlayıb. Bu barədə müəssisənin İdarə Heyətinin sədri Rüfət Quliyev bildirib.
"Belə bir ehtiyac Azərbaycanda siqaret çəkməyə qarşı başlamış böyük mübarizə tədbirləri ilə əlaqədar yaranıb. Biz əcnəbi təsisçilərə yüngül və keyfiyyətli siqaret istehsalının vacibliyini izah etdik" - deyə Quliyev bildirib.
Proqramın hazırlanması üçün marketinq üzrə yeni menecer dəvət olunub.
"European Tobacco-Baku"nun rəhbəri bildirib ki, bu ekspertin Avropa ölkələrində 20 illik təcrübəsi var. Ilkin mərhələdə müəssisəni yüngül tütünlə təmin edəcək əcnəbi tərəfdaş axtarılacaq.
"Bu proses artıq başlayıb, dünyanın ən iri iki tütün tədarükçüsü ilə danışıqlar aparılır. Bunlardan biri beynəlxalq Universal şirkətidir. Belə yüngül tütün 30-40 faiz baha başa gəlir, amma Avropa standartlarına keçid qaçılmazdır" - deyə Quliyev hesab edir.
Onun sözlərinə görə, ilin sonuna qədər yeni tədarükçülərdən Azərbaycana tütün gətiriləcək. Yeni texnologiya ilə siqaret istehsalına keçmək üçün tələb olunan əlavə investisiyanın həcmi 0,5-1 mln. dollar təşkil edir. Quliyev hesab edir ki, problem yalnız xammalla bağlıdır. Texnologiya ilə bağlı heç bir problem yoxdur.
Növbəti mərhələdə isə tütün kombinatında istehsal olunan siqaretlərin üz qabığı, siqaret kağızı və filterin üzərində iş aparılacaq. Tam keçid üçün bir il tələb olunur.
