Azərbaycan,Bakı/müxbir Trend S.Əliyev/2007-ci il mayın 11-dən başlayaraq (uçuşların yay cədvəlinə keçidilə əlaqədar) Azərbaycanın "İmair" aviaşirkətinin Bakı-Surqut-Bakı istiqaməti üzrə reysləri hər cümə günü həyata keçiriləcək. Bu barədə şirkətdən məlumat verilib. Bir sonluğa uçuş biletinin qiyməti 355 dollar (hava limanı rüsumu ilə birgə), "ora-geri" - 610 dollardır (hava limanı rüsumu ilə birgə). Uçuşlar TU-154 təyyarələri ilə həyata keçiriləcək.
2007-ci il mayın 30-dan etibarən Bakı-Daşkənd-Alma-Ata-Daşkənd-Bakı istiqaməti üzrə reyslər həftədə iki dəfə - çərşənbə və şənbə günləri həyata keçiriləcək. İyunun 21-dən etibarən cümə axşamı günləri Bakı-Bodrum-Bakı marşrutu üzrə reyslər həyata keçiriləcək.
"İmair" aviaşirkəti Azərbaycanda ilk şəxsi aviaşirkətdir, "İmproteks qrup" holdinqinə daxildir. Şirkətin Surqutda (Rusiya), Daşkənddə (Özbəkistan) nümayəndəlikləri, həmçinin Alma-Atada (Qazaxıstan) filialı var. Aviaşirkət 1994-cü ildə məhdud məsuliyyətli cəmiyyət kimi yaradılıb və həmin vaxt Azərbaycanın Ədliyyə Nazirliyində qeydiyyatdan keçib. Şirkətin əsas fəaliyyət istiqamətləri: daxili və beynəlxalq hava xətlərində müntəzəm sərnişin və çarter reysləri ilə sərnişin, yük, baqajın aviadaşınması, yer saxlama və digər aviaşirkətlərin aviadaşınmalarının satışı.
