Azərbaycan, Bakı /müx. Trend İ.Xəlilova / 2007-ci ilin aprelin 1-ə olan məlumata əsasən, Azərbaycanın xarici borcu 1978,4 mln. dollara bərabərdir. Azərbaycan Maliyyə Nazirliyindən verilən məlumata görə, bu, ÜDM-in 7,5 faizini təşkil edir. İlin əvvəli ilə müqayisədə xarici borcların həcmi 0,3 faiz artıb. Adambaşına düşən xarici borc 230 dollar təşkil edir.
Birinci rübdə ümumi məbləği 22,7 mln. dollar olan kreditlər sərf olunub. Xarici borcun xərcləri isə 40,7 mln. dollar təşkil edib. Əsas borcun payına 30,3 mln., faizlərə isə 10,4 mln. dollar düşür. Kreditlərin qaytarılması üçün büdcə vəsaitlərindən 12,5 mln. dollar ayrılıb.
Xarici borc strukturunda 19,1 faiz (378,8 mln. dollar) iqtisadi islahatlara yönələn kreditlərin payına düşür. Bu kreditlərdən 118,1 mln. dollar (6 faiz) Beynəlxalq Valyuta Fondu, 260,7 mln. dollar (13,1 proüent) isə Dünya Bankına aiddir.
Kreditlərin böyük hissəsi investisiya layihələrinin maliyyələşməsinə yönəlib - 1599,6 mln. dollar (80,9 faiz). Bu vəsaitlərin 37,9 faizi (749,2 mln. dollar) enerji sektoru, 7,5 faizi (148,8 mln. dollar) kənd təsərrüfatı və meliorasiya, 16,2 faizi (320 mln. dollar) yol tikintisi və nəqliyyat, 1,8 faizi (35 mln. dollar) kimya sənayesi, 1,4 faizi (26,8 mln. dollar) neft-qaz sektoru və 8 faizi (160 mln. dollar) sosial sahəyə sərf olunub.
