Azərbaycan, Bakı/ Trend / Birinci rüb ərzində nəqliyyat müəssisələri və və fiziki şəxslər tərəfindən Naxçıvan Muxtar Respublikasına 1752,9 min ton yük və 10966 min sərnişin daşınıb. Bu barədə cümə axşamı Naxçıvan MR-in Bakıdakı daimi nümayəndəliyindən bildirilib.
2006-cı ilin müvafiq dövrü ilə müqayisədə yük daşımalar 9,5 faiz, sərnişin daşıma isə 8,1 faiz artıb. Xidmətlərdən 6072,3 min manat gəlir götürülüb ki, bu da 2006-cı ilin müvafiq dövründən 6,7 faiz çoxdur.
Yükdaşımaların 99,6 faizi (1745,8 min ton), sərnişindaşımanın 93,6 faizi və ümumi gəlirlərin 78,3 faizi (4754,5 min manat) özəl sektorun payına düşüb.
Dövlət Statistrika Komitəsinin məlumatına görə, yanvar-mart ayları ərzində Azərbaycanın nəqliyyat sektorunda 36,5 mln. ton müxtəlif yük daşınıb. Bu da 2006-cı ilin müvafiq dövründən 18,2 faiz çoxdur. Bütün daşımaların ümumi həcminin 62,8 faizi özəl sektorun payına düşüb.
