Azərbaycan, Bakı/ Trend müxbir İ.Xəlilova/ Yanvar-mart ayları ərzində AtaBankın aktivləri 1,3% artaraq 63462,7 min manata çatıb. Bu barədə AtaHolding-dən məlumat verilib. Birinci rübdə Bankın ümumi depozit portfeli 12,6 faiz artaraq 42 764,2 min manat təşkil edib. İllin əvvəlində isə bu göstərici 37 981,8 min manata bərabər idi. Hesabat dövründə əhalinin banka pul qoyuluşları 13,6 faiz artaraq 24 031,2 min manat təşkil edib.
Müştərilərə verilmiş kreditlərin məbləği birinci rübdə 44 020,9 min manat təşkil edib ki, bu da 2007-ci il yanvarın 1-nə olan göstəricidən 4,8 faiz artıqdır.
Bankın təmiz gəliri 640,9 min manat təşkil edib.
Mart ayının sonunda AtaBankın ümumi kapitalı 10 052,1 min manat təşkil edib. Ilin əvvəli ilə müqayisədə ümumi kapital 7 faiz artıb.
Bu ilin martında AtaBank E-card müştəriləri üçün plastik kartlarla olan hesablarının idarə olunması üçün yeni interaktiv on-line sistemi istifadəyə verib, "SMS banking" xidmətini təkmilləşdirib və kommunal ödəmələrin qəbulunu həyata keçirməyə başlayıb.
Ötən üç ay müddətində bank Travelax təcili pul köçürmə sisteminə qoşulub. Bu gün AtaBank Bıstraaya Poçta, Migom, Privat Money və Western Union kimi beynəlxalq sürətli pul köçürmə sistemlərinin üzvüdür.
