Azərbaycan, Bakı/müxbir Trend İ.Xəlilova / Azərbaycan Maliyyə Nazirliyi Azərbaycan Respublikası ərazisində öz ölkə qanunvericiliyinə müvafiq fəaliyyət göstərəcək xarici sığorta şirkətlərinin açılmasının əleyhinədir. Bu barədə bazar ertəsi nazirliyin Sığorta nəzarəti şöbəsinin rəhbəri Namiq Xəlilov məlumat verib.
"Bu gün biz bununla razı deyilik və ölkənin sığorta bazarının tam liberallaşması üçün keçid dövrünün müəyyənləşdirilməsi məsələsi hələ müzakirə olunacaq" - deyə Xəlilov bildirib. Lakin onun sözlərinə görə, bir şirkətdə xarici kapitalın iştirak payı məhdudlaşdırılmayacaq, lakin ölkədə fəaliyyət göstərən bütün sığorta şirkətlərinin ümumi kapital həcmində xarici kapitala məhdudiyyət qəbul olunacaq.
Onun fikrincə, bu, daha liberal addımdır, lakin limitin konkret həcmi hələ müəyyən olunmayıb və mövcud payın dəqiqləşdirilməsi ilə mümkün olacaq. "Bu gün bu cür normativlərin olmaması səbəbindən statistika aparılmır və bu, bazarın açılması istiqamətində addım olacaq. Belə ki, bir çox iri sığortaçılar majoritar səhmdar kimi Azərbaycan bazarına daxil olmağı arzu edir" - deyə Xəlilov hesab edir. Onun sözlərinə görə, xarici iştirak həddini mövcud olduğunudan daha yüksək təyin etmək planlaşdırılır.
"Bu, ÜTT tələb etdiyi üçün olmayacaq, biz başa düşürük ki, Azərbaycan əhalisi üçün inkişaf etmiş ölkələrdə mövcud olan sığorta növlərinə çıxış açmalıyıq" - deyə Xəlilov bildirib.
Yeni redaksiyada "Sığorta haqqında" qanunda bir şirkətdə xarici sığorta kapitalının mümkün iştirakını 49 faiz nəzərdə tutan bənd çıxarılıb. Bu aparıcı sığorta şirkətlərinin ölkəyə gəlməsinin qarşısını alan əsas faktordur.
Nümayəndəliyin açılışına gəldikdə, Xəlilovun fikrincə, bu, əsas şirkəti üçün biznes axtarışı vacib olan təkrar sığorta şirkətləri üçün daha maraqlıdır.
Bu gün respublikada 29 sığorta şirkəti fəaliyyət göstərir, onların doqquzunda xarici kapital iştirak edir.
