Azərbaycan, Bakı/ Trend müxbir İ.Xəlilova/ Azərbaycan Milli Bankı (AMB) avqustun 1-nə hesablama dərəcəsinin artırılmasının məqsədəuyğunluğunun qiymətləndirməsini başa çatdırıb. AMB idarə heyətinin sədr müavini Avtandil Babayev cümə günü bildirib ki, yenidən maliyyələşdirmə faiz dərəcələrinin dəyişdirilməsi antiinflyasiya tədbirlərindən biridir. Buna görə, hər iki aydan bir bu göstəriciyə yenidən baxılır. 2007-ci ildə AMB-nin hesablama faizi iki dəfə dəyişilib. 2007-ci il iyunun 1-dən bu 12 faizdən 13 faizə qədər artırılıb.
Lakin "faiz dəhlizi"nin maksimum və minimum hüdudları əvvəlki səviyyədə saxlanılıb. Maksimun dəhliz 19 faiz, minimum isə 5 faiz təşkil edir. Bu faiz dərəcələri 12 faizlik hesablama dərəcəsi kimi aprelin 2-dən qüvvədədir (2006-cı ilin iyulundan 9,5 faizlik hesablama dərəcəsi qüvvədə idi).
Milli Bank qiymətləndirmə nəticəsində belə nəticəyə gəlib ki, hesablama dərəcəsinin yenidən baxılmasına ehtiyac yoxdur. "Bu onunla əlaqədardı ki, 12 ay ərzində inflyasiyanın artım tempi 15-16 faiz arasında dəyişib. İlin əvvəlində artım dinamikası enerji daşıyıcılarının qiymətinin artması ilə əlaqədar müşahidə olunurdu, amma istehlak qiymətlərinin hazırkı artım tempi ilin sonuna qədər bu templərin indiki səviyyədə saxlanılması faktını təsdiq edir", - deyə Babayev bildirib. Müvafiq olaraq AMB-nin hesablama dərəcəsinin artırılması ehtiyacı da aradan qalxmış olur.
Yeni "faiz dəhlizi" yanaşmasının tətbiqi və hesablama dərəcəsinin dəyişilməsində əsas məqsəd artıq pul təklifinin məhdudlaşdırılması və bununla inflyasiyanın qarşısını almaqdır. AMB gələcəkdə də inflyasiyanın səviyyəsindən asılı olaraq monetar və qeyri monetar amillərin monitorinqinin aparılacağını və hesablama dərəcəsinin dəyişilməsinə ehtiyacın olub olmamasını nəzərdən keçirəcəyini bəyan edib. Bu tədbirlər inflyasiyanın monetar amilləri üzərində nəzarətin gücləndirilməsinə yönəlib.
2007-ci ilin ikinci rübündən AMB-nin əməliyyatları üzərində "faiz dəhlizinin" tətbiqi və hesablama dərəcəsinin artırılması ölkə iqtisadiyyatında dezinflyasiya təsiri yaradıb. Milli Bankda hesab edirlər ki, ümumi xərclərin məhdudlaşdırılması və yığım normasının artırılması vasitəsilə dezinflyasiya prosesinin gücləndirilməsi məqsədilə çevik faiz siyasətini davam etdirmək lazımdır.