Azərbaycan, Bakı, 10 aprel / Trend , müxbir E.İsmayılov, S.Əliyev/ Bakı-Tbilisi-Ceyhan (BTC) neft kəmərinin operatoru olan "BP Azerbaijan" şirkəti boru kəmərinin nəql imkanlarını sutkada 1 mln. bareldən 1,2 mln. barelədək genişləndirilməsi üzrə işə başlayır. Bu barədə cümə axşamı layihəyə yaxın mənbədən məlumat verilib.
Mənbədən bildiriblər ki, "BP Azerbaijan" BTC boru kəmərinin baş nasos stansiyasının (PSA-1) olduğu Səngəçal terminalında yaxın günlərdə boru kəmərinə kimyəvi reagentlərin vurulması üzrə qurğunun tikintisinə başlayacaq ki, bu da BTC-nin nəql imkanlarının genişləndirilməsinə imkan yaradacaq.
Tikinti işləri "Azfen" Birgə Müəssisəsi (Azərbaycan Dövlət Neft Şirkəti (ARDNŞ) - 60 faiz, Türkiyənin "Tekfen" şirkəti 40 faiz iştirak payı ilə) ilə birgə həyta keçiriləcək. "Azfen" BM analoji qurğuları Gürcüstanın iki stansiyasında da quraşdıracaq. Türkiyədə nasos stansiyalarında kimyəvi reagentlərin boruya vurulması üçün qurğu tikintisini "Tekfen" şirkəti aparır. Azərbaycanın digər nasos stansiyasında reagentlər üçün avadanlığı quraşdıracaq şirkət, hələ ki, müəyyən edilməyib.
Boru kəmərinin nəql imkanlarını artıracaq inqibatorlar (kimyəvi reagentlər) artıq bu il tətbiq edilə bilər. Ekspertlərin ilkin qiymətləndirməsinə görə, Bakı-Tbilisi-Ceyhan boru kəmərinə kimyəvi reagentlərin tətbiq edilməsi üçün təxminən 100 mln. dollar dəyərində əlavə avadanlığın quraşdırılması lazımdır.
Hazırda BTC boru kəməri üzrə sutkada 750 min barel neft nəql olunur. Bununla yanaşı, boru kəmərinin nominal nəql imkanları artıq 1 mln. barelə çatıb.
İlin sonunadək stabil neft nəqli həcminin sutkada 1 mln. barelə qədər çatdırılması planlaşdırılır.
Azərbaycanın artan yüngül neft həcminin nəqli, həmçinin, Qazaxıstandakı digər istehsalçıların neftinin nəql olunması üçün boru kəmərinin nəql imkanlarının genişləndirilməsi lazımdır.
BTC boru kəmərinin səhmdarlarından biri və "Azəri"-"Çıraq"-"Günəşli" (Bu layihə iştirakçılarının əksər hissəsi BTC-nın səhmdarlarıdır) yataqlarının işlənməsi üzrə layihənin iştirakçısı olan Amerikanın "ChevronTexaco" şirkəti Qazaxıstanın "Tenqiz" yatağından hasil olunan neftin boru kəməri üzrə nəql olunmasında maraqlı olduğunu bildirib. Neftin Xəzər dənizi ilə tankerlərlə Bakıya çatdıırılması və Türkiyənin Aralıq dənizində yerləşən Ceyhan limanına nəql olunması üçün BTC-yə vurulması nəzərdə tutulur.
Boru kəmərinin nəql imkanlarının gələcəkdə sutkada 1,6 mln. barelədək genişləndirilməsi 2009-cu ildən sonra həyata keçirilə bilər. Nəql gücünü bu səviyyəyə bəzi yerlərdə boru kəməri üzrə dolanma sahələrinin tikilməsi və boru kəməri boyunca nasos stansiyalarına ələvə avadanlıqların quraşdırılması sayəsində nail olmaq olar.
Ötən ilin aprel ayından Azərbaycan yüngül neftinin dünya bazarlarına tədarükü, əsasən, BTC boru kəməri vasitəsilə həyta keçirilir. Ötən il ərzində bu neft kəməri vasitəsilə 28 mln. ton neft nəql olunub. BTC üzrə neft nəqli başlanan vaxtdan 45 mln. tondan çox neft ixrac olunub.
BTC-nin ümumi uzunluğu 1768 km-dir. Bu boru kəmərinin 443 km- i Azərbaycan, 249 km - i Gürcüstan; 1076 km - i isə, Türkiyə ərazisindən keçir. Boru kəmərinin tikintisi 2003-cü ilin aprel ayında başlayıb, onun neftlə doldurulması isə, 2005-ci il mayın 18 - də həyta keçirilib.
BTC-nin tikintisi 4 mlrd. dollara başa gəlib. Tikinti işləri, boru kəmərinin doldurulması, maliyyə xərcləri və bank faizlərinin ödənilməsi bu xərclərə daxil deyil. Maliyyə kreditinin ümumi həcmi 2,6 mlrd. təşkil edir.
BTC-nin səhmdarları: BP (30,1 faiz); AzBTC (25 faiz); Chevron (8,9 faiz); StatoilHydro (8,71 faiz); TRAO (6,53 faiz); Eni (5 faiz); Total (5 faiz); Itochu (3,40 faiz); Inpex (2,5 faiz); ConocoPhillips (2,50 faiz) və Hess (2,36 faiz).
Müəlliflə əlaqə saxlamaq üçün elektron ünvan: [email protected]
