Azərbaycan, Bakı, 30 may/ Trend / Bu ilin yanvar-apreli ərzində Azərbaycandan Türkiyəyə 1,5 mlrd. kubmetr qaz göndərilib. Bu qaz "Şahdəniz" yatağından hasil edilir və Cənubi Qafqaz qaz kəməri ilə (Bakı-Tbilisi-Ərzurum) nəql edilir. Bu barədə Türkiyənin Botas boru kəməri şirkətinin məlumatında deyilir. Bütün ötən il ərzində qaz tədarükü həcmi 1,3 mlrd. kubmetr təşkil edib.
Ümumilikdə yanvar-apreldə Türkiyəyə təqribən 14 mlrd. kubmetr qaz tədarük edilib. 2007-ci ildə bütün mənbələrdən Türkiyəyə 36,5 mlrd. kubmetr qaz tədarük edilib.
Yanvar-apreldə Rusiyadan Türkiyəyə təqribən 8,8 mlrd. kubmetr qaz tədarük edilib. 2007-ci ildə bu göstərici 20 mlrd. kubmetr təşkil edib.
Yanvar-apreldə İran qazının Türkiyəyə tədarük həcmi 1 mlrd. kubmetr təşkil edib (2007-ci ildə 6,2 mlrd. kubmetr). Türkiyə Nigeriyadan 481 mln. kubmetr qaz alıb (2007-ci ildə 1,4 mlrd. kubmetr). Əlcəzairdən dörd ay ərzində 1,8 mlrd. kubmetr qaz tədarük edilib (2007-ci ildə 4,3 mlrd. kubmetr).
Türkiyənin spot qiymətləri ilə aldığı mayeləşdirilmiş qazın həcmi yanvar-apreldə 339 mln. kubmetr təşkil edib. 2007-ci ildə bu göstərici 170 mln. kubmetrə bərabər olub.