Azərbaycan, Bakı, 14 avqust / Trend , müxbir E.İsmayılov/ Bakı-Novorossiysk ixrac neft kəmərinin Azərbaycan hissəsində aparılan təmir işləri Azərbaycan neftinin bu marşrutla ixracına təsir göstərməyib. Bu barədə cümə axşamı Azərbaycan Dövlət Neft Şirkətinin (ARDNŞ) Neft Kəmərləri İdarəsindən bildiriblər. Hazırda bu istiqamətdə neft nəqli normal rejimdə həyata keçirilir.
"Bakı-Novorossiysk boru kəmərində aparılan təmir işləri Azərbaycan neftinin nəqlinə təsir göstərməyib", - deyə idarədən bildriblər.
Neft kəmərində aparılan təmir işləri barədə ətraflı məlumat verilmir.
İdarədən bildiriblər ki, avqust ayında (Avqustun 14-nə olan məlumatlara görə) Səngəçal terminalından Bakı-Novorossiysk boru kəməri ilə 61891,7 ton neft, Şirvanovkadan isə 62629,2 ton neft ixrac olunub.
ARDNŞ -dən verilən məlumata görə, bu istiqamətdə neft ixracı əvvəlcədən nəzərdə tutulan təmir işləri səbəbindən dayandırılıb. Neft nəqli avqustun 12-də Bakı vaxtı ilə saat 18:00-da dayandırılıb və avqustun 13-də saat 09:15-də bərpa olunub.
Bakı-Novorossiysk boru kəmərinin operatoru ARDNŞ-dir. Bu boru kəməri ilə ARDNŞ-nin şəxsi yataqlarından hasil etdiyi neft, respublikanın quru ərazilərindən birgə müəssisə və əməliyyat şirkətlərinin nefti nəql olunur. Bakı -Tbilisi -Ceyhan boru kəmərində yanğınla bağlı olaraq nəqlin dayandırılmasından sonra, bu marşrut üzrə ABƏŞ -in "Azəri-Çıraq-Günəşli" yataqlarından hasil etdiyi neft də tədarük olunur.
Məqalə müəllifi ilə əlaqə ünvanı - capital
