Qazaxıstan, Astana, 15 sentyabr / Trend , müxbir K. Konırova/ Astanada "KazMunayQaz" SC milli şirkətinin prezidenti (İdarə Heyətinin sədri) Kairgəldi Kabıldin ilə "Total" şirkətinin Avropa və Mərkəzi Asiya üzrə vitse - prezidenti Arno Breyyak arasında görüş keçirilib. Bu barədə milli şirkətin mətbuat xidmətindən məlumat verilib.
"Görüşdə Şimal - Xəzər və Qazaxıstan Xəzər Nəqletmə Sistemi layihələri çərçivəsində şirkətlər arasında gələcək əməkdaşlığın perspektivləri müzakirə olunub", - deyə şirkətin yayılan press - relizində bildirilir. Bu sistem neftin gələcəkdə Bakı - Tbilisi - Ceyhan boru kəməri ilə göndərilməsi üçün Qazaxıstandan Xəzər vasitəsilə nəqlini nəzərdə tutur.
Məlumatda bildirilir ki, "Total"ın nümayəndəsi Şimal - Xəzər layihəsinin reallaşdırılması çərçivəsində, yeni birgə əməliyyat şirkətinin formalaşdrılmasını təklif edib.
"Hazırda layihəyə operatorluq məsələsi Qazaxıstan hökumətində nəzərdən keçirilir", - deyə məlumatda bildirilib.
"Total" şirkəti 1997-ci ildə imzlanan Şimali Xəzərdə məhsulların bölüşdürülməsi üzrə sazişin (MBS) iştirakçısıdır. MBS - ya əsasən, müqavilə ərazilərinə dörd neft strukturu daxildir: Kaşağan, Kalamkas, Aktotı, Kayran. Şimal - Xəzər layihəsinin iştirakçıları sırasına daxildir: "Eni", "Total", "ExxonMobil", "Royal Dutch/Shell" - 18,52%, "ConocoPhillips" - 9,26%, "Inpex" və "KazMunayQaz" - 8,33%.
"KazMunayQaz" SC milli şirkəti - karbohidrogenlərin tədqiqi, hasilatı, emalı və nəqli üzrə milli operatordur. Şirkət Qazaxıstanın neft - qaz sahəsində dövlətin maraqlarını təmsil edir. "KazMunayQaz" SC səhmlərinin 100% -i "Dövlət aktivlərinin idarə olunması üzrə Qazaxıstan Holdinqi "Samruk"" SC-yə məxsusdur.
Məqalə müəllifi ilə əlaqə ünvanı - [email protected]