Azərbaycan, Bakı, 27 noyabr/ Trend , müxbir A.Bədəlova/ Neft İxrac Edən Ölkələr Təşkilatının (OPEK) üzvləri noyabrın 29-da Qahirədə qiymətlərin gələcək düşməsinin qarşısının alınması üzrə tədbirlərin hazırlaması üçün qeyri-rəsmi görüş keçirəcəklər.
OPEK-in oktyabrın 24-də Vyanada keçirilmiş əvvəlki növbədənkənar iclasında noyabrın 1-dən hasilatın sutkada 1,5 mln. barel azaldılması barədə qərar qəbul edilib. Əvvəllər OPEK-ə üzv ölkələrin neft nazirlərinin növbəti görüşünün dekabrın 17-də Əlcəzairdə keçiriləcəyi planlaşdırılırdı.
Dünyada böyüklüyünə görə üçüncü bank JP Morgan-ın analitiki Lourens İqlsın (Lawrence Eagles) rəyinə görə, OPEK-in vaxtında azaltmalar barədə qərarın elan edilməsində müəyyən faydalar olacaq. Lakin Qahirədəki görüşün daha çox ehtimal olunan yekunu Əlcəzairdəkij dekabr iclasında hasilatın azaldılması ilə bağlı siqnal olacaq.
OPEK-in Qahirədə keçiriləcək iclasında hasilatın azaldılması haqqında qərarın qəbul edilməyəcəyini güman etmək üçün bir neçə səbəb var, - İqls elektron poçtla Trend -a bildirib.
Əvvəla, hələ ki dəqiq razılıq əlamətləri yoxdur, hasilatın sonrakı azaldılması isə yalnız suyu bulandıracaq.
Kartel üzvləri arasında hasilat kvotalarının azaldılmasına zərurətlə bağlı vahid rəy yoxdur. Belə ki, Nigeriya maliyyə böhranı şəraitində özünü valyuta mədaxilindən məhrum etmək niyyətində olmadığını bəyan edib və hasilatın azaldılması ilə razı deyil. İran və Küveyt istehsalın azaldılmasının lehinə çıxış edirlər.
İqlsin bildirdiyinə görə, bundan əlavə, yeni azaltmanı yanvarın 1-dək həyata keçirmək çətin olacaq və buna görə də, bunun elan edilməsinin mənası yoxdur.
İqls hesab edir ki, hasilatın azaldılması haqqında qərar siyasi mənada mənfi nəticələrə səbəb ola bilər: istehlakçılar tərəfdən OPEK-in dünya resessiyasının qızğın vaxtında qiymətləri artırması ilə bağlı çoxsaylı ittihamlar səslənə bilər.
İqlsin bildirdiyinə görə, istehsalçılar neftin resessiyaya toxunan yüksək qiymətlərindənsə, dünya iqtisadiyyatının artımını stimullaşdırmağa imkan verən aşağı qiymətləri ilə razılaşardılar.
"Və nəhayət, qiymətlərin artırılması istehlakçıları neftin aşağı qiymətləri faydalı olduğu vaxtda, yanacaqdan səmərəli istifadə üzrə tədbirlər görməyə təhrik edə bilər", - İqls qeyd edib.
OPEK-in prezidenti Şakib Xəlilin bəyan etdiyinə görə, kartel üzvlərinin görüşü çox ehtimal ki, neft hasilatının həcmləri sahəsində hər hansı dəyişikliklərə gətirməyəcək. Belə ki, öncə hasilatın azaldılması haqqında əvvəllər qəbul edilmiş qərarın icra edildiyinə əmin olmaq lazımdır. Onun sözlərinə görə, əsas qərar Əlcəzairdə keçiriləcək görüşdə qəbul ediləcək.
Lakin İqlsin sözlərinə görə, əksini düşünməyə imkan verən bəzi əsaslar var.
"Neft ixrac edən ərəb ölkələri təşkilatına daxil olmayan ölkələrin nazirləri nəyə görə Qahirəyə sadəcə söhbət etmək üçün getsinlər?", - İqls bildirib.
Qiymətlərin bir barelə görə 50 dollarlıq həddə düşməsi gözlənilməz nəticənin digər səbəbi ola bilər.
"Bundan əlavə, qeyri-fəallıq dekabrın 17-də keçiriləcək növbəti iclasadək qiymətlərin sonrakı düşməsinə gətirə bilər", - İqls bildirib.
Müəllifllə əlaqə saxamaq üçün elektron ünvan: с[email protected]
