Azərbaycan, Bakı, 05 yanvar/ Trend , E.İsmayılov/ Fevralda SOCAR-ın (Azərbaycan Dövlət Neft Şirkəti) Heydər Əliyev adına dərin özüllər zavodu "Ümid" perspektivli qazkondensat dəniz strukturunda ikibloklu "Ümid-1" platforması üçün səkkiz modulun göndərilməsini həyata keçirəcək. Bu barədə bazar ertəsi zavodda işlərə yaxın mənbə bildirib.
"Yeddi modul artıq hazırdır. Səkkizinci modul isə, yanvarın sonunda bu modulda yerləşdiriləcək qazma avadanlığının əldə edilməsindən sonra hazır olacaq", - deyə mənbə bildirib. Modulların fevral ayında göndərilməsi planlaşdırılır.
Quyunun qazmasını həyata keçirəcək "Kompleks qazma işləri" Trestinin rəhbəri İsgəndər Şirəli əvvəllər bildirib ki, "Ümid"də kəşfiyyat quyusunun qazılması Çin istehsalı olan yeni ZJ70/4500DZ qazma avadanlığının istifadəsi ilə həyata keçiriləcək. O bildirib ki, yeni avadanlığın köməkliyi ilə 7000-7500 metr dərinliyində quyu qazmaq olar. Yeni avadanlıq Trestə məxsusdur.
Platformanın hər iki bloku nəzərdə tutulan yerdə quraşdırılıb. Platformanın hər iki blokunun tikintisini dərin özüllər zavodu həyata keçirib. Perspektivli strukturun özü N.Nərimanov adına Neft-Qaz Çıxarma İdarəsinin tərkibinə daxildir.
Qazmaya martda başlanması planlaşdırılır. Əvvəllər qazmanın 2008-ci ilin sonunadək başlanması planlaşdırılırdı. Qazmanın başlamasının gecikməsinin əsas səbəbi platformanın tikintisində çətinliklərin olması ilə bağlıdır.
"Ümid- 1" dəniz platformasının istismarı SOCAR-a şəxsi vəsaitlər hesabına işlənən yataqlarda qaz hasilatının artırılması üzrə proqramın reallaşdırılması çərçivəsində lazımdır. Proqrama əsasən, SOCAR-ın dövlətə təhvil verməli olduğu təbii qaz həcmi səkkiz mlrd. kubmetr təşkil etməlidir. Bu il SOCAR səkkiz mlrd. kubmetr qaz hasil etməyi planlaşdırır ki, bunun da yeddi mlrd.-ı dövlətə təhvil veriləcək.
Tikilməkdə olan "Çıraq-6" platformasının bazasında inşa edilən "Ümid-1" platforması proqram çərçivəsində ən iri obyektdir. Onun hündürlüyü 72 metr təşkil edir. Platforma suyun 58 metr dərinliyində "Bulla dəniz" dəniz yatağından 15 km. aralıda yerləşəcək. SOCAR-dan əvvəllər verilən məlumata görə, platformadan altı qaz quyusunun qazılması planlaşdırılır. Strukturda ilk kəşfiyyat quyusunun layihə dərinliyi 6500 metr təşkil edir.
"Ümid" dəniz strukturunda ümumi çıxarılması ehtimal olunan qaz ehtiyyatları SOCAR geoloqlarının qiymətləndirməsinə görə, 200-300 mlrd. kubmetr təşkil edir.
Məqalə müəllifi ilə əlaqə ünvanı - [email protected].
