Azərbaycan, Bakı, 12 fevral/ Trend , müxbir E.İsmayılov/ Amerika və Qazaxıstanın birgə müəssisəsi "Tengizşevroyl" martda Türkiyənin Ceyhan limanından "Tengiz" yatağından çıxarılan 600 min barel Qazaxıstan nefti göndərəcək. Fevralda Bakı-Tbilisi-Ceyhan (BTC) üzrə 1,2 mln. barel Qazaxıstan neftinin nəqli planlaşdırlır.
Energy Intelligence Group agentliyi tərəfindən Trend -a təqdim olunan tədarük cədvəlinə əsasən, tengiz nefti partiyası Ceyhandan martın 22-24-də göndəriləcək.
Amerikanın ChevronTexaco şirkəti 2008-ci ildə BTC ilə Tengiz neftini nəql etməyə başlayıb. Sazişin şərtlərinə əsasən, Tengiz nefti Bakı-Tbiilsi-Ceyhan boru kəməri və dəmir yolu ilə Gürcüstanın Kulevi və Batumi limanlarına nəql olunacaq.
ChevronTexaco Qazaxıstanın "Tengiz" yatağının operatorudur. Müqavilə sahəsinin istismarı ilə "Tengizşevroyl" əməliyyat şirkəti məşğul olur.
"BTC Co"nun səhmdarları: BP (30,1 faiz); "AzBTC" (25 faiz); "Chevron" (8,9 faiz); "StatoilHydro" (8,71 faiz); "TRAO" (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,5 faiz); "ConocoPhillips" (2,50 faiz) və "Hess" (2,36 faiz).
Gürcüstanın Qara dəniz Kulevi terminalının sahibi Azərbaycan Dövlət Neft Şirkəti, Batumi limanının sahibi isə "KazMunayqaz"dır.
Məqalə müəllifi ilə əlaqə ünvanı: [email protected]
