Azərbaycan, Bakı, 21 fevral // Trend
Dövlət Gömrük komitəsi xəbər verir ki, 2009-cu ilin yanvar ayında boru kəmər və dəmir yolu vasitəsi ilə Azərbaycandan 3 milyon tona yaxın neft ixrac olunub.
Bakı-Tbilisi-Ceyhan (BTC) kəməri ilə 2,3 milyon tondan artıq neft ixrac olunub. BTC boru kəməri vasitəsi ilə "Azəri-Çıraq-Günəşli" yatağında əldə olunan yüngül neft nəql edilir. Neft kəmərinin operatoru BP şirkətidir. Layihənin yalnız iki iştirakçısı - ExxonMobil və Devon Amerika şirkətləri paylarına düşən nefti BTC boru kəməri ilə nəql etmirlər. Bu şirkətlər BTC-nin tikintisinə sərmayə yatırmadıqları üçün paylarına düşən nefti dəmiryolu ilə nəql edərək Gürcüstanın Batumi limanı vasitəsi ilə satırlar.
Bakı-Novorosiysk kəməri komitəsinin bildirdiyinə görə, yanvar ayı ərzində kəmər vasitəsi ilə 167 min ton neft ixrac edilib. Bu boru kəmər vasitəsi ilə əsasən Azərbaycan Dövlət Neft Şirkətinə məxsus SOCAR şirkətinin yataqlardan öz hesabına əldə etdiyi neft və müştərək müəssisələrin qurudakı yataqlardan əldə etdiyi xam mallar nəql edilir.
Komitə qeyd edir ki, Bakı-Supsa kəməri ilə də 2009-cu ilin yanvar ayı ərzində 383 min ton neft ixrac edilib. Boru-kəmərin operatoru Azərbaycan beynəlxalq əməliyyat şirkətidir.
Komitənin məlumatında bildirilir ki, dəmiryolu vasitəsi ilə bu dönəm ərzində 46 min tona yaxın neft ixrac olunub. Dəmiryolu ilə Gürcüstanın Qara dəniz limanlarına Amerikanın ExxonMobil və Devon şirkətlərinin "Azəri-Çırağ-Günəşli" yataqlarından nəql etdiyi neftdən əlavə Azərbaycan, Qazaxstan və Türkmənistandan nəql edilən tranzit xammal da çatdırılır.
