Azərbaycan, Bakı, 08 may / Trend /
Yanvar-martda Bakı-Tbilisi-Ceyhan (BTC) neft kəməri ilə "Azəri-Çıraq-Günəşli" yataqları bloku və "Şahdəniz" yatağından hasil edilən 8,7 mln. ton (65 mln. barel) yüngül Azərbaycan nefti və kondensat ixrac olunub. Bu barədə BP şirkətinin (layihələrin operatoru) məlumatında bildirilir.
2008-ci ildə BTC üzrə kapital xərcləri 164 mln. dollar təşkil edib. Layihə üzrə 2009-cu il üçün kapital xərcləri 143 mln. dollar (birinci rübdə xərclər 18 mln. dollar təşkil edib) təşkil edəcək.
Boru kəmərinin layihə nəql gücü bir milyon bareldir. 2009-cu ilin martında müqavimət gücünün azaldılması üçün kimyəvi reagentlərin tətbiqi hesabına BTC-nin nəql imkanlarının sutkada 1,2 mln. barelədək artırılması üzrə işlər başa çatdırılıb.
Bu neft kəməri ilə nəqlə başlanılan vaxtdan (2006-cı il iyun) indiyədək Ceyhan limanına 760 tanker (600 mln. barel - təqribən 80 mln. ton neft) göndərilib.
Hazırda BTC boru kəməri ilə "Azəri-Çıraq-Günəşli" yataqları blokundan çıxarılan neft və "Şahdəniz" yatağından çıxarılan kondensat, həmçinin Qazaxıstanın "Tengiz" yatağından hasil edilən neftin bir hissəsi nəql olunur. Qazaxıstanın "Tengiz" yatağından çıxarılan neft həcmlərinin bir hissəsi ilk dəfə BTC ilə ötən ilin oktyabrında ixrac olunub.
"BTC Co"nun səhmdarları: BP (30,1 faiz); "AzBTC" (25,00 faiz); "Chevron" (8,90 faiz); "StatoilHydro" (8,71 faiz); "TRAO" (6,53 faiz); "Eni" (5,00 faiz); "Total" (5 faiz); "Itochu" (3,40 faiz); "Inpex" (2,50 faiz); "ConocoPhillips" (2,50 faiz) və "Hess" (2,36 faiz).
