Azərbaycan, Bakı, 04 iyun / Trend , müxbir E.İsmayılov /
"Yarım il əvvələ nisbətən hazırda Azərbaycan və Türkiyə Azərbaycan qazının Türkiyə ərazisindən tranziti üzrə müqaviləni bağlamağa daha yaxındır", - Türkiyənin sənaye və təbii resurslar nazirinin müavini Yusuf Yazar deyib.
"Danışıqlarda dəyişikliklər var. Danışıqlar davam etdirilir və yeni nazirin gəlişi ilə bu proses sürətlənib", - nazir müavini bildirib.
Yazarın sözlərinə görə, Azərbaycan həm də "Nabukko" layihəsində perspektivli qaz tədarükçülərindən biridir. Bu layihəyə Türkmənistanın da qoşulması gözlənilir. Onun fikrincə, İraq qazının bu kəmərə qoşulması perspektivi bir qədər dumanlıdır. Siyasi problemlər arxada qoyulacağı təqdirdə isə İranın da layihəyə cəlb edilməsi mümkündür.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixrac etmək nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə strat veriləcək. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir. Layihənin ümumi dəyərinin təxminən 30 faizi layihədə iştirak payı əsasında Nabucco Gas Pipeline International-ın səhmdarları tərəfindən ödəniləcək, qalan 70 faizi isə kreditorların hesabına maliyyələşdiriləcək.
Azərbaycan tərəfi ilə danışıqların daha bir mövzusu Azərbaycan qazının İTGİ ilə ötürülməsidir. "Türkiyədən Yunanıstana qaz kəməri çəkilib, fəaliyyətdədir və qaz bu istiqamətdə satılır", - Yazar deyib.
Azərbaycan qazının Yunanıstan və İtaliyaya tədarükünü həyata keçirməyi nəzərdə tutan İTGİ nəqliyyat dəhlizi, özündə yenilənmiş boru kəməri infrastrukturunu, həmçinin İTG və IGI layihələrini ehtiva edir. Yunanıstan-İtaliya birləşdirici boru kəməri - İGİ - Türkiyə-Yunanıstan-İtaliya nəqliyyat dəhlizinin - İTG - çatışmayan bəndidir. Bu kəmər Xəzər və Yaxın Şərq regionundan qazı Türkiyə və Yunanıstan ərazisindən İtaliya və Qərbi Avropaya nəql etmək imkanı verəcək. İTGİ-nin planlaşdırılan buraxılış gücü ildə 12 milyard kubmetrdir.
Yazarın sözlərinə görə, hazırda Türkiyənin enerji daşıyıcılarına olan tələbatının yalnız 30 faizi daxili ehtiyatlar hesabına ödənilir, qalanı idxal edilir. Türkiyənin illik qaz tələbatı 34-36 milyard kubmetr həcmindədir, amma bu tələbat günbəgün artır. Ölkədəki qaz tələbatının yaınız 1,5-2 milyard kubmetri daxildə sitehsal edilir, qalanı idxal edilir.
Məqalə müəllifi ilə əlaqə ünvanı: [email protected]