Azərbaycan, Bakı, 07 avqust / Trend , müxbir E.İsmayılov /
Gürcüstanın Poti Qara dəniz limanının konteyner terminalı altındakı 14 nömrəli körpünün yenidən qurulması çərçivəsində Almaniyanın Gotwald şirkətinin müasir texnologiya sistemləri ilə təchiz olunan iki yeni kranın quraşdırılması üzrə işlər başlayıb. Bu barədə limanının rəsmi saytında yerləşdirilən məlumatda deyilir. Yeni kranlar limanda olan kranlardan iki dəfə güclüdür.
Kranlar ötən həftə alınıb və artıq onların quraşdırılmasına başlanılıb. Yaxın günlərdə körpünün yenidən qurulması çərçivəsində lazım olacaq digər texnikanın alınması gözlənilir.
Konteyner terminalı altında 14 nömrəli körpünün yenidən qurulmasına yazda başlanılıb. Terminalın oktyabr ayında istismara verilməsi planlaşdırılır ki, bu da limanın konteyner gücünün iki dəfə artırılmasına imkan verir.
Son beş ildə Poti limanının konteyner dövriyyəsi 25 faiz artıb. Məhz buna görə böyük imkanlara sahib yeni konteyner terminalının inşası vacib olub.
Poti limanında cəmi 15 terminal mövcuddur, bu barədə limanın saytında deyilir.
Bu il Gürcüstanın Beynəlxalq Qara dəniz limanı Poti vasitəsilə 1,5 milyon ton neftin, 8 milyon ton yükün daşınması planlaşdırılır.
Məqalə müəllifi ilə əlaqə ünvanı: [email protected]