Azərbaycan, Bakı, 18 avqust / Trend /
2009-cu ilin birinci yarısında Azərbaycanda "Şahdəniz" qaz-kondensat yatağında hasilat təxminən 3,4 milyard kubmetr qaz və təxminən 0,9 milyon ton kondensat təşkil edib. Bu barədə BP şirkətinin (layihənin operatoru) hesabatında deyilir.
Məlumatda qeyd edildiyi kimi, 2009-cu ildə 7,5 milyard kubmetr qaz və 1,9 milyon ton kondensat hasil etmək planlaşdırlır.
2009-cu ilin birinci yarısında yataqda hasilat dörd əməliyyat quyusundan stabil davam etdirilir və çıxarılan məhsul Azərbaycan, Gürcüstan və Türkiyə ilə sərhəddə seçim məntəqələrinə çatdırılır.
2009-cu ilin birinci yarısında "Şahdəniz"də beş yataqdan sutkalıq hasilat təxminən 19 milyon kubmetr qaz və təxminən 40 min barel kondensatdır.
Hasilat növbəti bir neçə il ərzində platformada qazılan yeni quyular istismara verildikcə artırılacaq. Yataqda hasilatın "Mərhələ-1" çərçivəsində ildə 8,6 milyard kubmetr qaz və sutkada təxminən 45 min barel kondensat təşkil edəcəyi gözlənilir.
"Şahdəniz" yatağında ümumi qaz ehtiyatı 1,2 trln. kubmetr həcmində qiymətləndirilir.
"Şahdəniz" layihəsində hasilatın iş bölgüsü barədə müqavilənin iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
