Azərbaycan, Bakı, 24 avqust / Trend , müxbir E.İsmayılov /
ARDNŞ (Azərbaycan Respublikası Dövlət Neft Şirkəti) avqustun 28-də Bakı-Novorossiysk şimal neft kəməri ilə bu aya nəzərdə tutulmuş neft həcminin nəqlini başa çatdırmağı planlaşdırır. Bu barədə bazar ertəsi ARDNŞ-dəki mənbə deyib.
"Avqusta nəzərdə tutulmuş həcmdə neftin nəqli davam etdirilir və avqustun 28-də onun başa çatdırılması gözlənilir", - mənbə deyib.
Onun sözlərinə görə, hazırda şimal istiqamətində sutkada təxminən 9 min ton neft nəql edilir. Ayın əvvəlindən indiyədək Bakı-Novorossiysk neft kəməri ilə bu aya palnlaşdırılmış 240 min tona qarşı artıq 216 min tondan çox neft ixrac edilib.
Sabah həmçinin neft kəmərində səkkiz saatlıq planlı dayandırma nəzərdə tutulub. Bu ayda ümumilikdə 12, 18 və 25 avqustda hər biri səkkiz saatlıq fasilə planlaşdırılıb.
Proqnoza əsasən, neft kəməri ilə sentyabrda 140 min, oktyabrda 248 min ton, noyabrda 240 min ton, dekabrda isə 140 min ton neft ixrac etmək planlaşdırılır.
ARDNŞ bu ilin yanvar-iyul aylarında Bakı-Novorossiysk şimal boru kəməri vasitəsilə 1,5 milyon tona qədər neft ixrac edib. Keçən ilin müvafiq dövründəki göstərici 782 min tondan çox olub. Bu barədə ARDNŞ-dən verilən məlumatda deyilir.
İyulda bu boru kəməri ilə ötən ilin müvafiq dövründəki təxminən 83,7 min tona qarşı 247 min ton neft ixrac olunub.
2009-cu ildə ARDNŞ Bakı-Novorossiysk boru kəməri ilə neft nəqlini 2,5 milyon tonadək artırmaq niyyətindədir. Bu göstərici 2008-ci ildə 1,3 milyon ton olub.
2006 və 2007-ci ildə bu marşrutla daşınan neftin həcmi 1,2 milyon tona yaxın olub. 2005-ci ildə Bakı-Novorossiysklə 1,6 milyon ton neft nəql edilib.
Bu gün Azərbaycan Bakı-Novorossiysk boru kəməri ilə ixrac vasitəsilə digər istehsalçıların nefti ilə qarışdığı üçün Urals markalı neftə çıxış əldə edir.
2007-ci ilin sonuna qədər Bakı-Novorossiysk boru kəmərinin operatoru ABƏŞ olub. Sonra bu finksiya ARDNŞ-ə təhvil verilib.
Məqalə müəllifi ilə əlaqə ünvanı: [email protected]
