Azərbaycan, Bakı, 03 oktyabr / Trend , müxbir E.İsmayılov/
ARDNŞ-nin istifadəsində olan Gürcüstanın 31-ci qaz təsərrüfatının yeniləşdirilməsi üzrə üçillik proqramın həyata keçirilməsinin ikinci və üçüncü ili üçün nəzərdə tutulan lazımi investisiyaların həcmi planlaşdırılan işlərin smetasının hazırlanmasından sonra müəyyən ediləcək. Bu barədə cümə günü SOCAR Georgia Gas-ın rəhbəri Anar Məmmədov bildirib. SOCAR Energy Georgia ARDNŞ-nin törəmə müəssisəsidir.
"İkinci və üçüncü ildə investisiyaların həcmi layihə-smeta sənədləşməsinin hazırlanmasından sonra müəyyənləşdiriləcək", - o deyib.
Məmmədov bildirib ki, layihələndirmə başa çatıb və ölkənin bütün regionlarında, xüsusən də Əhmədi, Dmanisi, Saqareco, Laqodexi, Duşeti, Msxeta, Ozurqetsi, Lançxuti, Çoxatauri, Zestafoni, Xaşuri və digər rayonlar, həmçinin Batumi və Kobuleti şəhərlərində qazpaylayıcı şəbəkələrin irimiqyaslı tikinti-montaj işləri genişləndirilib. Razılaşmaların tərtibi prosesi davam edir və buna müvafiq olaraq tikinti işlərinin miqyası genişləndirilir.
"Həmçinin mövcud qaz kəmərlərinin bərpası planı tərib edilib və Zuqdidi, Saqareco, Laqodexi şəhərlərində onun icrasına başlanılıb", - Məmmədov bildirib.
Məmmədovun dediyi kimi, proqramın birinci ili üzrə investisiya 48 milyon lari (28,5 milyon dollardan çox) təşkil edir. Bu vəsait hesabına 57 min yeni potensial istehlakı üçün 800 kilometr uzunluğunda qazpaylayıcı şəbəkə tikiləcək.
SOCAR Energy Georgia-dakı mənbənin əvvəlcədən bildirdiyi kimi, bu layihənin üç il ərzində həyata keçirilməsi üçün investisiya ilkin 40 milyon dollardan 70-80 milyon dollara kimi arta bilər. "İlkin mərhələdə bu layihə çərçivəsində güman edilən investisiyaların minimum həcmi 40 milyon dollar təşkil edirdi, bu minimum limit idi, paylayıcı şəbəkələrin bərpasını nəzərə almaqla qazlaşdırma işləri üzrə xərclər təxminən 70-80 milyon dollar təşkil edə bilər", - mənbə bildirib.
Məmmədov bir müddət əvvəl dermişdi ki, hazırda ARDNŞ-nin istifadəsində olan qazpaylayıcı şəbəkələrin tələbatı ildə təxminən 80-90 milyon kubmetr qaz təşkil edir. Üçillik proqram çərçivəsində bu şəbəkələrin istehlakçılarının sayının təxminən 60 min nəfərdən 150 min nəfərə kimi artırılması planlaşdırılır. İstehlakçıların sayının artırılmasından sonra bu şəbəkələrin illik tələbatı minimum iki dəfə artırılacaq.
Ötən il dekabrın 26-da ARDNŞ və Gürcüstan hökuməti ölkənin Kaxeti, Msxeta-Mtianeti, Şida və Kvemo-Kartli, Acariya, Quriya, İmereti, Sameqrelo kimi regionlarını əhatə edən 30 qazpaylayıcı təsərrüfatın və qazpaylayıcı şəbəkələrin idarəyə verilməsi üzrə müqavilə imzalayıb. Bu şəbəkələr 24 şirkət tərəfindən işlədilib.
Aprel ayında SOCAR Energy Georgia Gürcüstanın əsasən azərbaycanlıların yaşadığı Marnueli rayonunun qazpaylayıcı şəbəkəsini də istifadəyə götürüb. Marnuelinin paylama şəbəkəsi SOCAR Energy Georgia-nın Gürcüstanda istifadəyə götürdüyü 31-ci qaz təsərrüfatıdır.
Əvvəl Marnuelidə qazpaylayıcı şəbəkələrin sahibi Wissol şirkəti idi. O, ARDNŞ-dən qaz alaraq Marnuelidə onun satışı ilə məşğul olurdu. Hazırda bu istiqamətdəki bütün işlər SOCAR Energy Georgia tərəfindən həyata keçiriləcək.
Məqalə müəllifi ilə əlaqə ünvanı: [email protected]
