Azərbaycan, Bakı, 07 oktyabr / Trend /
Dövlət komissiyası "Darvin Bankəsi" yatağında ARDNŞ tərəfindən işlənən yeni onblokluq platformanı istismara götürüb. Bu barədə ARDNŞ tərəfindən çərşənbə günü yayılan məlumatda belə deyilir.
Yeni platforma suyun 17 metr dərinliyində quraşdırılıb. Platformada 12 quyunun qazılması planlaşdırılır. "Neft Daşları" Dövlət Qazma İdarəsi artıq quyuların qazılmasına başlayıb. Hazırda "Darvin Bankəsi" yatağında 121 quyu istismar edilir. Yatağın ümumi sutkalıq hasilat həcmi 200 tondur ki, bu da Neft Qaz Çıxarma İdarəsinin ümumi hasilatının 44 faizini təşkil edir.
"Darvin Bankəsi" yatağı 1950-ci ildən işlənir. Ötən dövr ərzində burada 651 quyu qazılıb və 16,2 milyon ton neft hasil edilib. Yataqda qalan, çıxarıla bilən qaz ehtiyatı 3 milyon ton olaraq qiymətləndirilir. Ümumilikdə 2009-cu ildə yataqda 8 quyu qazılmalıdır.
Hazırda 12 blokdan ibarət iri platformanın tikilməsinə dair işlər aparılır. Platforma dərinliyi 1300 metr olan 20 quyunun qazılmasına hesablanıb. Platforma suyun 15 metr dərinliyində quraşdırılacaq.