Azərbaycan, Bakı, 07 dekabr / Trend /
ARDNŞ-nin (Azərbaycan Respublikası Dövlət Neft Şirkəti) Kulevi Qara dəniz neft terminalının səhmdarlarından ibarət nümayəndə heyəti terminala səfər edərək onun fəaliyyəti ilə tanış olublar. Bu barədə terminalın rəsmi internet saytında yayılmış məlumatda deyilir.
Nümayəndə heyətinə ARDNŞ prezidenti Rövnəq Abdullayev, ARDNŞ-nin Xarici investisiyalar şöbəsinin müdiri Vaqif Əliyev və gürcüstanlı səhmdar Vano Çxartişvili rəhbərlik edib.
Səhmdarlara görülmüş, cari və gələcək işlər barədə məlumat verilib. Terminal, qonaq evi və limanla tanışlıqdan sonra ARDNŞ prezidenti menecerlərlə görüşüb.
Terminalın yükboşaltmasının ümumi gücü üç milyon ton neft, üç milyon ton dizel yanacağı, dörd milyon ton mazut daxil olmaqla, ildə 10 milyon ton neft-maye yükü təşkil edir. O, eyni vaxtda 168-dək vaqon-sistern qəbul edə bilər. Rezervuar parkının ümumi həcmi 320 min kubmetr təşkil edir. İki il ərzində terminalın buraxılış gücünün 15-20 milyon tona kimi artırılması planlaşdırılır.
