Azərbaycan, Bakı, 29 yanvar / Trend /
Energetika sahəsində Azərbaycanla əməkdaşlığa dair işçi qrupunun sədri Tudor Şerbanın rəhbərliyi ilə Rumıniya nümayəndə heyəti fevralın 1-5-də Azərbaycanda olacaq. Bu barədə cümə günü Azərbaycanın Sənaye və Energetika Nazirliyinin mətbuat xidmətinin rəhbəri Azər Mənsimli deyib. Şerban Rumıniyanın sənaye və iqtisadiyyat, ticarət və biznes mühiti nazirinin müavinidir.
Səfər çərçivəsində nümayəndə heyətinin üzvləri Azərbaycanın sənaye və energetika naziri Natiq Əliyev, ARDNŞ (Azərbaycan Respubliksı Dövlət Neft Şirkəti) prezidenti Rövnəq Abdullayev, xarici işlər nazirinin müavini Mahmud Məmmədquliyev və digər rəsmi şəxslərlə görüşəcək.
Şerbanın rəhbərlik etdiyi nümayəndə heyətinə Sənaye və İqtisadiyyat, Ticarət və Biznes Mühiti Nazirliyinin enerji, neft və qaz şöbəsinin rəhbəri Korneliu Kondrea, Rumıniya Xarici İşlər Nazirliyinin Şərqi Avropa və Mərkəzi Asiya üzrə idarəsinin rəhbəri Vasile Soare, XİN-in strateji iqtisadi siyasət idarəsinin rəhbəri Mixai Xarbiç, "Romqaz" şirkətinin rəhbəri Mares Adrian, "Transqaz" şirkətinin baş direktoru Rusi Nakalae daxil olacaq.
Bu il yanvarın 13-də Gürcüstanda keçirilən energetika konfransı çərçivəsində Rumıniya tərəfi Azərbaycan-Gürcüstan-Rumıniya istiqaməti üzrə qaz nəqli marşrutlarının inkişafı üçün əməkdaşlıq haqqında üçtərəfli müqavilə imzalamağı təklif edib. Rumıniya hökuməti hesab edir ki, bu layihə yalnız Rumıniya üçün deyil, həmçinin Aİ ölkələrini qazla təmin etmək üçün böyük əhəmiyyət kəsb edir. Rumıniya Aİ-nin dəstəklədiyi bu layihənin maliyyələşdirilməsi məsələsində bir neçə alternativ təklifə malikdir.
