Azərbaycan, Bakı, 04 fevral / Trend /
"Ekol Mühəndislik Xidmətləri" QSC tərəfindən yaradılan "AAS-EKOL" yeni birgə müəssisəsi və Hollandiyanın "AA Servicess" şirkəti BP Azerbaijan şirkətinə tullantıların idarə olunması sahəsində mühəndislik xidmətləri göstərməyə hazırlaşır. Bu barədə "Ekol" QSC-nin təsisçisi olan ARDNŞ-in (Azərbaycan Respublikası Dövlət Neft Şirkəti) məlumatında deyilir.
Ötən il hər iki şirkət "Tullantıların idarə olunması xidmətlərinin göstərilməsi" layihəsi üzrə BP Azerbaijan şirkətinin elan etdiyi tenderin qalibi olub.
Məlumatda deyildiyi kimi, birgə müəssisə 2010-cu il fevralın 1-də dövlət qeydiyyatından keçib.
Müəssisənin yaradılmasında məqsəd şirkətlərin maddi-texniki imkanlarından istifadə etməklə, həm BP Azerbaijan şirkətinə, həm də ölkəmizdə fəaliyyət göstərən digər xarici şirkətlərə tullantıların (ərsin parafini, neft şlamı, qazma şlamı, lay suları, neftli-çirkli sular, çirklənmiş torpaqlar, bərk tullantılar və s.) idarə olunması sahəsində mühəndislik xidmətlərinin göstərilməsidir.
Abşeron rayonunda mövcud olan ekoloji problemləri həll etmək üçün 2006-cı ildə yaradılan Ekol QSC-nin həmtəsisçiləri ARDNŞ (51 faiz) və Lancer S.A. Services (49 faiz) şirkətləridir.
