Türkmənistan, Aşqabad, 04 fevral / Trend , müxbir H.Həsənov/
Dünən Aşqabada gələn İranın xarici işlər nazirinin müavini Mehdi Səfəri Türkmənistan tərəfi ilə Xəzər dənizinin statusu məsələsini müzakirə edib.
"Tərəflər beynəlxalq hüquq normaları, yaxşı qonşuluq, bütün Xəzəryanı dövlətlərin maraqlarına hörmət əsasındakı qərarlarına qarşılıqlı sadiq olduqlarını təsdiq ediblər", - Türkmənistan XİN-in press-relizində deyilir.
İki ölkənin nümayəndə heyətləri Türkmənistan-İran əlaqələrinin aktual məsələləri və qarşılıqlı maraq təmsil edən beynəlxalq problemlər üzrə fikir mübadiləsi aparıblar.
İran və Türkmənistan 2010-cu ilin yanvar ayında Dövlətabad-Sərəxs-Xangiran marşrutu üzrə yeni qaz kəməri açıblar. İnformasiyada o da qeyd olunur ki, Bərəkət şəhərindən Türkmənistan-İran sərhədinə qədər dəmiryolun inşasına başlanması əlaqələrin gələcəkdə durmadan inkişaf etməsinin mühüm faktorudur.
Tərəflərin fikrincə, bu faktlar ildən-ilə dayanıqlı artım dinamikası nümayiş etdirən və yeni perspektivli istiqamətlər əhatə edən ikitərəfli əməkdaşlığın böyük potensialına sübutdur.
