Azərbaycan, Bakı, 19 fevral / Trend , müxbir E.İsmayılov/
Gələn həftə Sənaye və Energetika Nazirliyi dövlət strukturlarının layihəyə təqdim edilən qazdan istifadə qaydaları üzrə tikliflərini gözdən keçirəcək. Bunu Sənaye və Energetika Nazirliyi yanında Dövlət Qaz Nəzarəti İdarəsinin rəhbəri Asif Zeynalov cümə günü deyib.
"Hazırlanmış qaydaların göndərildiyi bütün strukturlar tərəfindən rəy və tövsiyələr alınıb. Gələn həftənin əvvələrində onlar nazirlikdə gözdən keçiriləcək və müzakirə ediləcək", - Zeynalov deyib.
Onun sözlərinə görə, sənəd hazırlandıqdan sonra ölkənin Nazirlər Kabinetinə təqdim edilib. Nazirlər Kabineti də öz növbəsində sənədi müvafiq strukturlara, xüsusilə də Fövqəladə Hallar, Ədliyyə, Maliyyə, Səhiyyə və digər nazirliklərə göndərib.
Zeynalov deyib ki, Azərbaycanda indiyədək vahid şəklə salınmış qazdan istifadə qaydaları olmayıb. Hazırlanmış sənəd istehlakçı hüquqlarının müdafiəsinə yönəlib və insanları qazdan istifadə sahəsində qayda və vəzifələr barədə informasiyalaşdırmaq məqsədi daşıyır.
Zeynalov nümunə kimi qayda layihəsində öz əksini tapan bəndlərdən birini göstərib. Əgər indi yaşayış üçün istifadə edilməyən binaların birinci mərtəbəsində qazdan istifadə qadağan edilibsə, bənzər obyektlərdə yeni qazdan istifadə qaydaları da nəzərdə tutulub. İcazə bir dördkonforlu plitənin və bir standartlara cavab verən suqızdırıcısının olmasını nəzərdə tutur.
Təklif və rəylər gözdən keçirildikdən və razılaşdırıldıqdan sonra sənəd təsdiq edilməsi üçün Nazirlər Kabinetinə göndəriləcək.
