Böyük Britaniya, London, 11 mart / Trend , müxbir N.İsmayılova/
Sənaye və Energetika Nazirliyi yanında Alternativ və Bərpa Olunan Enerji Mənbələri üzrə Dövlət Agentliyi alternativ və bərpa olunan enerji mənbələri sahəsində ölkə qanunvericiliyinə dəyişikliklərə dair təkliflərini Azərbaycan Prezident Administrasiyasına təqdim edəcək. Bu barədə agentliyin rəhbəri Akim Bədəlov "Böyük Britaniya Azərbaycanda" ticarət-investisiya forumundakı çıxışında bildirib. Martın 8-də Londonda keçirilmiş forum Yaxın Şərq Assosiasiyası və Azərbaycan Beynəlxalq Bankı tərəfindən təşkil olunub.
Agentlik öz işinə 2010-cu ilin fevralında başlayıb. Onun əsas məqsədi alternativ enerji mənbələri hesabına 2015-ci ilədək 1000 meqavat, 2020-ci ilədək 2500 meqavat gücündə elektrik enerjisi istehsalına nail olmaqdır. Bu, 2020-ci il üçün proqnozlaşdırılan enerji istehsalının ümumi həcminin 20-25 faizə qədərini təşkil edir. Bundan ötrü termal enerji, günəş, külək və su enerjisindən geniş istifadə planlaşdırılır.
"Hazırda bu işlərin həyata keçirilməsi üçün strateji planlaşdırma aparılır. Eyni zamanda, idarəetmə sisteminin düzgün təşkili üçün ölkənin digər dövlət strukturları ilə qanunvericilik bazasının dəyişdirilməsi razılaşdırılır", - Bədəlov bildirib.
Onun sözlərinə görə, həm strateji planlaşdırma, həm də qanunvericilik bazasına dəyişikliklərin təhlili zamanı agentlik müxtəlif ölkələrin bu məsələlərdə təcrübəsi olan mütəxəssislərindən geniş istifadə edib.
