...

Hava şəraiti ARDNŞ-in Xəzərin perspektiv strukturunda tədqiqatlarını çətinləşdirir

Energetika Materials 29 Aprel 2010 12:38 (UTC +04:00)
Xəzər dənizinin Azərbaycan sektorunda yerləşən "Bahar-2" perspektiv dəniz strukturunda üçölçülü geofiziki tədqiqatlara (3D) başlanması əlverişsiz hava şəraiti ilə əlaqədar yubanır. Bu barədə cümə axşamı ARDNŞ-dəki mənbə bildirib.

Azərbaycan, Bakı, 29 aprel /Trend, müxbir E.İsmayılov/

Xəzər dənizinin Azərbaycan sektorunda yerləşən "Bahar-2" perspektiv dəniz strukturunda üçölçülü geofiziki tədqiqatlara (3D) başlanması əlverişsiz hava şəraiti ilə əlaqədar yubanır. Bu barədə cümə axşamı ARDNŞ-dəki mənbə bildirib.

Strukturda 3D tədqiqatlarının bir hissəsi ötən il aparılıb, sonra mövsümi iqlim dəyişiklikləri ilə əlaqədar işlər dayandırılıb. İşlərin bərpası aprelin sonlarına planlaşdırılıb. Strukturda üçölçülü tədqiqatların aparılması onun geoloji quruluşunun müəyyən olunması üçün vacibdir.

"Hələlik işlərə başlanılmayıb. Əsas səbəb qeyri-sabit əlverişsiz hava şəraitidir ki, bu da dənizdə işi çətinləşdirir", - mənbə deyib.

Bundan əvvəl ARDNŞ və Bahar Energy Limited arasında imzalanmış Xəzər dənizinin Azərbaycan sektorunda yerləşən "Bahar" və "Qum-Qəniz" dəniz yataqlarının daxil olduğu blokun kəşfiyyatına, reabilitasiyasına, işlənməsinə və hasilatına dair PSA tipli müqavilə imzalanıb. Bu həftə müqavilə Azərbaycan Parlamenti tərəfindən ratifikasiya olunub.

Müqavilənin ikinci hissəsində "Bahar-2" strukturunda kəşfiyyat işlərinin aparılması nəzərdə tutulur. Üç il müddətində bir kəşfiyyat quyusunun qazılması planlaşdırılır. Əgər ehtiyac yaranarsa, dördüncü il daha bir quyu qazıla bilər. İlkin hesablamalara görə, müqavilə çərçivəsində Bahar Energy Limited şirkəti bir milyard dollar həcmində investisiya qoyacaq.

1969-cu ildən işlənən "Bahar" yatağı Bakının cənub-şərqindən 40 kilometr məsafədə yerləşir. İndiyədək yataqdan 16,8 milyon tondan çox neft və 128,7 milyard kubmetrə yaxın qaz hasil edilib.

Növbəti beş il ərzində ARDNŞ-in mütəxəssisləri "Bahar" yatağında qaz hasilatının 15 faiz, kondensatın 10 faiz səviyyəsində azalacağını proqnozlaşdırır.

ARDNŞ ölkədə qaz hasilatının həcminin artırılması məqsədilə perspektiv dəniz strukturlarının, o cümlədən "Bahar-2" meydanının öyrənilməsini həyata keçirir.

Xəbər lenti

Xəbər lenti