Аzərbaycan, Bakı, 17 iyun /Trend/
ARDNŞ-nin (Azərbaycan Respublikası Dövlət Neft Şirkəti) Geologiya və Geofizika İdarəsi Qalmaz qaz anbarında qazın saxlanılma gücünün artırılması məqsədilə 3D seysmik kəşfiyyat işlərini başa çatdırıb. Bu barədə cümə axşamı ARDNŞ-dən yayılan məlumatda deyilir.
Kəşfiyyat işləri Qalmaz qaz anbarının geoloji quruluşunun dəqiqləşdirilməsi, tutum imkanlarının artırılmasının qiymətləndirilməsi, ücölçülü modelinin qurulması məqsədilə aparılıb.
Mütəxəssislər alınmış seysmik məlumatların keyfiyyətini qənaətbəxş hesab etmişlər.
2010-cu ildə Azərbaycanın yeraltı qaz anbarlarının aktiv həcmi 3 milyard kubmetr təşkil edir. Ötən il bu göstərici 2 milyard, 2008-ci ildə isə 1,4 milyard kubmetr təşkil edib.
Cari ildə yeraltı qaz anbarlarına 2009-cu ildəki 1,3 milyard kubmetrə nisbətdə 1,9 milyard kubmetr qaz doldurulması nəzərdə tutulur.
Hazırda respublika iki yeraltı qaz anbarına malikdir - Qaradağ və Qalmaz.
ARDNŞ-dan verilən məlumata əsasən, ötən il Qaradağ və Qalmaz yeraltı qaz anbarlarına müvafiq olaraq 507,7 və 794,9 milyon kubmetr qaz doldurulub.
Payız və qış mövsümlərində istifadə üçün Azərbaycanın yeraltı qaz anbarlarına qazın doldurulması oktyabrda başa çatacaq.
